Pirelli-nin baş mühəndisi Simone Berra bildirib: “Hava şəraiti trasda işləmək imkanlarını məhdudlaşdırdı. Həftəsonunun qalan hissəsinə hazırlıq baxımından bugünkü sərbəst yürüşlər o qədər də faydalı olmadı.
İlk sessiya zamanı trasda çoxlu su gölməçələri var idi və komandalar yalnız quraşdırma dövrələri vura bildilər. İkinci sessiyada trasın vəziyyəti tədricən yaxşılaşsa da, asfalt çox yavaş quruyurdu.
Məşqin əvvəlində bütün pilotlar güclü yağış üçün nəzərdə tutulan şinlərdən istifadə edirdilər. Daha sonra komandalar keçid təkərlərə keçdilər. Keçid mərhələsində belə dənlənmə əlamətləri müşahidə olunmadı.
Yarış trayektoriyası quruduqca keçid təkərlərin aşınması qaçılmaz olaraq artdı. Bu, xüsusilə sessiyanın sonuna yaxın, ideal trayektoriyanın demək olar ki, tamamilə quruduğu vaxt daha çox hiss olunurdu. Lakin quru təkərlərə keçmək imkanı yaranmadı. Çünki trasın bəzi hissələri, o cümlədən asfalt üzərində yol nişanlanmasının olduğu sahələr hələ də yaş idi.
Belə şəraitdə həmin hissələr xüsusilə sürüşkən olurdu. Üstəlik, aşağı temperatur quru təkərləri lazımi iş temperaturuna qədər tez qızdırmağı çətinləşdirərdi.
Proqnoza görə, nə sıralanma turlarında, nə də yarış zamanı yağış gözlənilir. Buna görə də trasda ən vacib işlər, yəqin ki, şənbə günü başlayacaq. Həmin vaxt komandalar sazlamalar üzərində işləyə və strategiya seçimi üçün daha çox faydalı məlumat toplaya biləcəklər.
Bu baxımdan, günün sonunda hansı təkər dəstlərinin qaytarılacağını izləmək maraqlı olacaq. Bu, bazar günü keçiriləcək yarışda komandaların hansı strategiyaya üstünlük verəcəyi barədə ilkin təsəvvür yaradacaq”.






Şərh əlavə et