M. de Palo Formula 3-də ilk qələbəsini qazanıb

Yarışı ikinci pillədə Ernesto Rivera, üçüncü yerdə isə Matsey Qladıış başa vurub. Polşalı pilot mükafatlandırma mərasiminə gecikib, çünki finişdən sonra səhvən “qapalı park”a yox, dəstək seriyalarının paddokuna yollanıb.

Yarış təhlükəsizlik avtomobilinin arxasında iki isinmə dövrəsi ilə başlayıb. Hava +17°C, asfalt isə +23°C olub. Dövrələrin sayı 22-dən 21-ə endirilib.

Pouldan start alan Freddi Sleyter ilk döngədə Teofil Naelin hücumunu dəf edərək liderliyini qoruyub.

Dördüncü yerdən başlayan Ernesto Rivera startda iki mövqe itirib. Matteo de Palo və Fionn Maklaflin onu geridə qoyublar. Çempionat lideri Uqo Uqoçukvu isə 12-ci yerdən 10-cu pilləyə yüksəlib.

İkinci dövrədə de Palo 16-cı döngədə Luis Şarpı keçərək üçüncü yerə qalxıb. Bir dövrə sonra DRS-in köməyi ilə Teofil Naeli də geridə qoyaraq ikinci olub.

Dördüncü dövrədə italiyalı pilot komanda yoldaşı Freddi Sleyteri də ötərək yarışın liderliyini ələ keçirib. Arxada isə Uqoçukvu Evan Devidi keçərək doqquzuncu yerə yüksəlib.

Altıncı dövrədə Nikola Lakorta texniki problem səbəbindən boksa qayıdıb. Uhyon Şin pit tolunda sürət həddini aşdığı üçün 5 saniyə cərimə alıb.

Yeddinci dövrədə Sleyter 15-ci döngədən əvvəl de Palonu keçərək liderliyi geri qaytarıb. Onuncu dövrədə isə Rivera Matsey Qladıışı ötərək beşinci yerə yüksəlib.

12-ci dövrədə Trident pilotları yenidən yer dəyişiblər və de Palo liderliyi bərpa edib. Bu zaman Luis Şarp bir neçə mövqe itirərək dördüncü yerdən doqquzunculuğa geriləyib.

18-ci dövrədə Rikardo Eskotto arxadan Jerar Sinin maşınına çırpılıb və trasa təhlükəsizlik avtomobili çıxıb. Eskottonun bolidi zədələnsə də, Si yarışa davam edə bilib.

Yarış son dövrədə yenidən start götürüb. De Palo və Sleyter liderlik uğrunda gərgin mübarizə aparıblar və onların bolidləri üç dəfə təmas edib. Buna baxmayaraq, de Palo liderliyini qoruyub.

Doqquzuncu döngənin çıxışında Sleyter sürət itirib. Bundan istifadə edən Teofil Nael onu keçib. Dövrənin sonuna qədər Sleyter Ernesto Rivera, Matsey Qladıış və Ceyms Uortona da uduzub.

Matteo de Palo finiş xəttini birinci keçərək Formula 3-də ilk qələbəsini qazanıb.

Teofil Nael ikinci olsa da, Luis Şarpı trasdan çıxarmağa görə aldığı 10 saniyəlik cərimə nəticəsində ilk onluqdan kənara düşüb.

Beləliklə, ikinci yerə ən sürətli dövrəni də göstərən Ernesto Rivera yüksəlib. Üçüncü olan Matsey Qladıış isə Formula 3 karyerasında ilk dəfə podiuma çıxıb.

Çempionatın lideri Uqo Uqoçukvu altıncı yeri tutaraq xal qazanıb. Silverstoun mərhələsindən sonra onun ən yaxın izləyicisi Freddi Sleyter üzərində üstünlüyü 19 xal təşkil edir.

Formula 3 mövsümünün növbəti mərhələsi 17-19 iyul tarixlərində Spa-Frankorşam trasında keçiriləcək.