Maks Ferstappendən sonra finiş xəttini ikinci keçən McLaren pilotu yarış ərzində baş verən hadisələrin çoxluğu səbəbindən mübarizəni belə xarakterizə edib: “Düşünürəm ki, bu, Formula 1 tarixinin ən xaotik yarışı ola bilər!
Yarışın yarısında nələrin baş verdiyini heç özüm də anlamırdım! Burada hər şey mümkün idi: həm qələbə qazana, həm də sonuncu yerə qədər geriləyə bilərdim!
Xaotik, amma əyləncəli gün idi. Komanda olaraq yaxşı nəticə əldə etdik”.
Trasda çoxsaylı ötmələrin baş verməsi və mübarizənin daim dəyişməsi barədə danışan Norris əlavə edib: “Düşünürəm ki, bu yarışı start düzülüşündəki istənilən pilot qazana bilərdi.
Əyləncəli yarış oldu. Maksı təbrik edirəm, ön sıralarda həqiqətən yaxşı iş gördü.
Deyəsən, təxminən 15 saniyə ərzində lider oldum. Buna görə də qürur duyuram! Yarışa liderlik etdim, amma Maks çox yaxşı sürdü, heç bir səhvə yol vermədi və onların tempi kifayət qədər yüksək idi.
Bizim üçün yaxşı gün oldu. İlk iki-üç yerdən birini tutacağımızı gözləmirdim. Buna görə də nəticəmizi olduqca müsbət qiymətləndirirəm”.






Şərh əlavə et