Meksika Qran Prisinin ilk dövrəsində Lyuis Həmiltonla Şarl Lekler arasında yaşanan təmas və əldən verilən qələbə Ferrari daxilində gərginliyi artırıb. Komanda rəhbərliyi Braziliya Qran Prisi öncəsi bu məsələni müzakirə etmək qərarına gəlib.
Hadisənin Ferrari-nin yarışı ilk iki pillədə başa vurmaq şansını aradan qaldırdığını deyən Fred Vassyör pilotların davranışını hörmətsizlik kimi qiymətləndirmişdi. O, San-Pauluda hər iki pilotla keçirdiyi mühüm toplantının təfərrüatlarını açıqlayıb.
Vassyör görüşün olduqca məhsuldar keçdiyini bildirib. O, pilotlara Ferrari brendinin, zavodda çalışan əməkdaşların və Tifosinin hər şeydən üstün olduğunu qəti şəkildə xatırlatdıqlarını vurğulayıb.
Frederik Vassyör: “Görüş çox məhsuldar keçdi. Həm öz mövqeyimi, həm də onların vəziyyətini müzakirə etmək və hər şeyi aydınlaşdırmaq yaxşı oldu. Bu toplantı vacib idi. İndi həmin səhifəni bağlayıb növbəti yarışa köklənirik.
Amma günün sonunda qaydalar həmişə eynidir: onlar bir-birlərinə hörmət etməlidirlər. Hər ikisi mübariz ruhlu və rəqabətə köklənmiş pilotdur, lakin bir-birlərinə hər zaman hörmət göstərməlidirlər. Hər şeydən əvvəl isə brendə, komandaya, ailəsini dolandırmaq üçün zavodda və trasda çalışan insanlara hörmət etməlidirlər.
Bu məsələyə çox böyük diqqət ayırırıq. Verdiyimiz mesaj son dərəcə aydın idi və belə də qalacaq.
İki təcrübəli və rəqabətədavamlı pilotumuz var. Monza və Madriddən bəri son dörd-beş yarışda ardıcıl olaraq ən çox xal toplayan komanda bizik. Hamımızın qələbə qazanmaq istədiyi belə vacib mərhələdə bu cür hadisələrin baş verməsi qaçılmazdır.
Hər həftəsonu startda yanaşı dayanan iki rəqabətədavamlı pilota sahib olmağın bəlkə də mənfi tərəfi budur. Amma bu gün komandalar çempionatında ikinci yerdəyiksə, bunun səbəblərindən biri də məhz iki güclü pilotumuzun olmasıdır. Biz bu vəziyyəti idarə etməliyik. Pilot cütlüyümüzün həm üstünlükləri, həm də çatışmazlıqları var. Çatışmazlıqların öhdəsindən də gələcəyik.
Bu hadisədə komanda olaraq uğursuzluğa düçar olduğumuz aydındır. Çünki yarışı birinci və ikinci pillələrdə başa vurmaq imkanımız olsa da, qələbə qazana bilmədik. Bu, uğursuz olduğumuzu və vəziyyətə reaksiya verməli olduğumuzu açıq şəkildə göstərir.
Dünən axşamkı toplantının nəticəsi çox aydın idi: Ferrari hər şeydən əvvəl gəlir. Brend, əməkdaşlar və Tifosi naminə ilk növbədə Ferrari gəlir. Bunu hər zaman yadda saxlamalıyıq”.
Şərh əlavə et