İnterlaqosda keçiriləcək Braziliya Qran Prisi öncəsi güc qurğusunun daxiliyanma mühərriki komponentinin dəyişdirilməsi qərarı verilib. Mövsüm üçün müəyyən edilmiş mühərrik limitinin aşılması səbəbindən tətbiq olunan standart cəza çərçivəsində V6 mühərrik bloku, silindr başlıqları, porşenlər və dirsəkli val yenilənib. Turbo və MGU qurğuları isə dəyişdirilməyib.
Mercedes-in sosial media hesablarında məsələ ilə bağlı danışan britaniyalı pilot bildirib ki, Sinqapur Qran Prisindən mövsümün sonunadək bu cəzanı almalı olacaqları əvvəlcədən məlum idi. Komanda dəyişiklik üçün ötmə imkanlarının daha əlverişli olduğu Braziliya trasını seçib.
Rassell 2021-ci ildə eyni trasda daha ağır start cəzası almasına baxmayaraq, gerilərdən yüksələrək qələbə qazanan keçmiş komanda yoldaşı Lyuis Həmiltonun çıxışını da xatırladıb. Britaniyalı pilot bazar günü podium uğrunda mübarizəyə qayıtmaq üçün əlindən gələni edəcəyini bildirib: “Sinqapur yarışından mövsümün sonunadək hansısa mərhələdə start cəzası almalı idim. Mühərriki dəyişdirmək üçün ən uyğun trasın bura olduğuna qərar verdik.
Lyuis Həmilton bir neçə il əvvəl burada daha böyük start cəzası almışdı, amma əla yarış keçirərək qələbə qazanmışdı. Beş yerlik cəza o qədər də pis görünmür. Bazar günü gerilərdən başlayaraq ön sıralara yüksəlməyə çalışacağıq”.
Şərh əlavə et