Pirelli Motorsport-un direktoru Dario Marrafuski bildirib ki, Ferrari və Haasın sprintdə Soft təkərlərə üstünlük verməsi qırmızı işarəli təkərlərin bazar günü də strategiyanın bir hissəsinə çevrilə biləcəyini göstərib. Bununla belə, Hard və Medium təkərlərin daha çox seçiləcəyi gözlənilir: “Yarışın gedişində hər üç tərkibdən istifadə oluna bilər. Soft təkərlər sprint məsafəsində effektivliyini itirmədən daha inamlı ilişmə təmin edirdi. Bu, Şarl Leklerə yüksək tempi qorumağa və Lando Norrisi təqib etməyə imkan verdi.
Nisbətən aşağı temperatur da kömək etdi və Ferrari pilotu təkərləri optimal iş diapazonunda saxlaya bildi. Sprint zamanı həmçinin Zandfortda ötmələrin ciddi çətinlik yarada biləcəyi bir daha təsdiqləndi. Komandalar pit-stop zamanı itirilən mövqeləri hesablayarkən bu vacib amili nəzərə alacaqlar”.
Marrafuskinin sözlərinə görə, ən sürətli strategiya bir pit-stoplu variantdır. Bu halda yarışa Medium təkərlərlə başlayıb 27-33-cü dövrələr arasında Hard təkərlərə keçmək tövsiyə olunur.
Alternativ variant isə Soft təkərlərlə start götürmək və 26-32-ci dövrələr arasında pit-stop edərək yarışın qalan hissəsini Hard təkərlərlə tamamlamaqdır. Bu strategiyanın təxminən 1 saniyə daha yavaş olacağı hesablanır.
Trafik olmasaydı, iki pit-stoplu strategiya da rəqabətədavamlı ola bilərdi. Lakin Zandfortda ötmələrin çətinliyi bu seçimin əsas çatışmazlığıdır.
Bununla belə, Təhlükəsizlik Avtomobili və ya virtual təhlükəsizlik avtomobili rejimi tətbiq olunarsa, yaxud trafik imkan verərsə erkən pit-stop üçün fürsət yaranarsa, iki dayanacaqlı strategiyanı da istisna etmək olmaz.
Marrafuski həmçinin bildirib ki, sprintdə temperatur səbəbindən təkər deqradasiyası orta səviyyədə olub. Qran Pri məsafəsində pilotların təkərlərə qənaət etməyə çalışacağı nəzərə alınarsa, xüsusilə iki daha sərt tərkib üçün bu amilin strategiya seçimində həlledici olması gözlənilmir.
Şərh əlavə et