Sprint sessiyasında yaşanan çətinliklərin ardından əsas sıralanma turlarında da pis nəticə təhlükəsi ilə üzləşən Ferrari pilotu son cəhdində yaxşı dövrə vuraraq beşinci yeri tutub və komanda yoldaşı Şarl Lekleri geridə qoyub.
Britaniyalı pilotun sözlərinə görə, Ferrari-nin avtomobildə etdiyi kiçik dəyişikliklər SF-26-nın balansını tamamilə pozub. Sıralanma turundan əvvəl edilən yeni sazlanmalar isə avtomobili yenidən daha uyğun iş diapazonuna qaytarıb.
Son dövrəsində beşinci yerə yüksəlməsini dəyərləndirən Lyuis Həmilton Sky F1-a deyib: “Bunu bacardığım üçün minnətdaram. Çünki düşünürəm ki, səkkizinci və ya buna bənzər bir yerdə idim. Həmin anda ürəyim ağzıma gəldi. Amma bu, tamamilə fərqli sessiya və tamamilə fərqli avtomobil idi.
İlk məşq sessiyasında avtomobil möhtəşəm hiss etdirirdi və çox stabil idi. Əlbəttə, hər zaman inkişaf etdirə biləcəyiniz sahələr olur. Bunları düzəltmək üçün kiçik dəyişikliklər etdik, lakin bu, avtomobilin balansını tamamilə dəyişdi və onu dəhşətli vəziyyətə saldı.
Sprint sıralanma turunda və daha sonra sprint yarışının tamamında balansın verdiyi inam demək olar ki, yox idi. Bundan sonra sıralanma turlarından əvvəl bütün bu dəyişiklikləri etdik. Beləliklə, yenidən fərqli avtomobillə və fərqli balansla trasa çıxdım və bundan daha çox razıyam. Ancaq bunun üzərində işləmək, avtomobili anlamaq və bütün bunları cəmi altı dövrə ərzində etmək çətin idi.
Həmçinin qarşımızda Mercedes mühərrikindən istifadə edən bütün avtomobillər var və güc baxımından bir qədər geridə olduğumuzu bilirik. Buna görə də düşünürəm ki, bu gün yarış tempimiz daha yaxşı olmalıdır. Dediyim kimi, avtomobil bizim üçün indi daha yaxşı vəziyyətdədir”.
Şərh əlavə et