Keçən mövsümün bitməsindən cəmi 96 gün keçib və bu müddət ərzində maşınlar demək olar ki, dəyişməyib, lakin əksər komandalarda sürücü dəyişikliyi olub, Lyuis Həmilton Ferrari-yə keçərək transferlər mövsümünü hələ 1 il əvvəl açıb.
Niko Hülkenberq Sauber ilə trasa ilk çıxan sürücü olub, bir neçə dəqiqədən sonra Həmilton və digərləri ilk cəhdləri üçün Medium şinləri seçiblər. Pitdə yalnız Aleks Albon qalıb – Williams bir qədər gecikib, amma tezliklə o da sürücülərini trasa buraxıb. Maks Ferstappen birinci dövrəni ən sürətli – 1:19,771-lə başa vurub və sonra onun nəticələri yaxşılaşmağa başlayıb.
Louson 9-cu döngədə divarla təmas yaşayıb, Ferstappen isə 7-ci döngədə çınqıllığa çıxıb. Lakin hər iki halda ciddi insident baş verməyib. Startdan 19 dəqiqə sonra isə Cek Duhənin qəzasından sonra trasa yayılmış çınqılları təmizləmək üçün sessiya qırmızı bayraqlarla dayandırılıb. Fasilədən sonra Rassell, Ferstappen və Antonelli yumşaq təkərlərlə trasa qayıdıblar.
İkinci qırmızı bayraqlar isə başqa bir yeniyeytmənin – Bermanın qəzasına görə dalğalanıb. O, əvvəlcə çınqıllığa çıxıb, sonra isə divara çırpılıb. Heç bir xəsarət almasa da, müayinə üçün tibbi mərkəzə göndərilib. Bu dəfə də fasilə qısamüddətli olub.
Rassell son dəqiqədə 4-cü döngənin təhlükəsizlik zonasında yerində fırlanıb, lakin divara toxunmaqdan yayına bilib.
Gözlənildiyi kimi, nəticələr sıx olub və ilk 13 sürücünün nəticəsi 1 saniyəlik intervala sığıb. Ən yaxşı nəticə isə Lando Norrisdən gəlib – 1:17.252.
Məşqlər bu gün davam edəcək.
Şərh əlavə et