İnterlaqosdakı yarışa bütün pilotlar keçid təkərləri ilə başlayıblar. Poul mövqeyindən start alan Lando Norris beş qırmızı işıq söndükdən sonra Kimi Antonellinin qarşısını kəsməyə çalışsa da, buna nail ola bilməyib. Antonelli liderliyi ələ keçirib.
Çox yaxşı start alan Liam Louson ikinci yerə yüksəlib. Lyuis Həmilton startdan sonra 11 mövqe qazanaraq doqquzuncu yerə, Maks Ferstappen isə doqquz pillə irəliləyərək mövqeyini yaxşılaşdırıb.
Dördüncü dövrədə Ferstappen Həmiltonu geridə qoyaraq doqquzuncu yerə yüksəlib. Bundan sonra hücumlarını davam etdirən niderlandlı pilot yeddinci pilləyə qədər irəliləyib.
Bu arada Antonelli ön qrupda Norris ilə fərqi 4,5 saniyəyə çatdırıb.
Trasdan çıxaraq üstünlük əldə etdiyi üçün Həmilton stüardların diqqətinə düşüb. Komandadan ona mövqeyini Oli Bermana qaytarmaq tapşırılıb. Nəticədə Ferrari pilotu komanda yoldaşının arxasına keçərək 12-ci yerə geriləyib. Daha sonra Şarl Lekler və Fernando Alonso da Həmiltonu qabaqlayıblar.
Həmilton komanda ilə radio əlaqəsində pitə gələrək quru hava təkərlərinə keçmək istədiyini bildirib. O, 15-ci dövrədə pitə daxil olub. Onun ardınca bir çox pilot təkərlərini dəyişsə də, Antonelli və Ferstappen trasda qalmağa üstünlük veriblər.
20-ci dövrədə bütün pilotlar pitə gələrək Soft təkərlərə keçiblər. Corc Rassell pit yolunda bolid üzərində nəzarəti itirərək fırlansa da, daha sonra trasda hərəkətini davam etdirə bilib.
Bir neçə dövrə sonra lider Antonelli də fırlanıb və ikinci yerə geriləyərək liderliyi Norrisə verib. Cəmi bir dövrə sonra Ayzek Hacar da Antonellini qabaqlayaraq ikinci pilləyə yüksəlib.
24-cü dövrədə Antonelli bir daha trasdan çıxıb və bu dəfə Ferstappenə mövqeyini təhvil verib.
Ayzek Hacara radio vasitəsilə 15 dəqiqə ərzində yağışın başlaya biləcəyi bildirilib.
Yarışın orta nöqtəsinə çatanda Norris Ferstappen üzərində 10 saniyəlik üstünlüklə liderliyini davam etdirib. Aleks Elbon isə trasdan çıxdıqdan sonra təhlükəli şəkildə geri qayıtdığı üçün beş saniyəlik cərimə alıb. Təxminən 40-cı dövrədə ikinci pit-stoplar başlayıb.
48-ci dövrədə Hacara yüngül yağışın başladığı barədə məlumat verilib.
Lider Norris pitə gələrək trasdakı mövqeyini Hacara təhvil verib. Bir dövrə sonra Hacar da pitə daxil olub. Beləliklə, Antonelli yenidən liderliyə yüksəlib.
Son 10 dövrəyə daxil olarkən trasda yağış damcıları artmağa başlayıb. Yağışın güclənməsi ilə əlaqədar FIA Ötmə Modunu deaktiv edib.
Pilotlar təkər dəyişmək üçün pitə çağırılıb və pitə daxil olan bolidlərə keçid təkərləri taxılıb.
Qırmızı zolaqlı yumşaq təkərlərlə hərəkətini davam etdirən Lyuis Həmilton pitə gəlməzdən əvvəl yerində fırlansa da, baryerlərə sərt şəkildə çırpılmaqdan son anda qurtulub.
Son dövrələrdə Liam Louson və Şarl Lekler arasında yeddinci yer uğrunda təkər-təkərə mübarizə yaşanıb. Bu dueldən qalib ayrılan Lekler olub.
71 dövrəlik yarışın sonunda damalı bayraq Lando Norrisi qalib kimi qarşılayıb.
Red Bull Maks Ferstappen və Ayzek Hacarın sayəsində ikiqat podium qazanıb. Onların ardınca Mercedes pilotları finişə çatıblar.
Oskar Piastri altıncı, Şarl Lekler isə yeddinci yeri tutub. İlk onluğu müvafiq olaraq Liam Louson, Lyuis Həmilton və Niko Hülkenberq tamamlayıblar.
Şərh əlavə et