Sıralanma turundan sonra danışan pilot nəticəni yaxşı hesab etsə də, potensialını tam ortaya qoya bilmədiyini vurğulayıb.
Liam Louson: “Düşünürəm ki, yaxşı nəticədir. Amma pilot olaraq hər zaman potensialınızı maksimum dərəcədə ortaya qoymaq istəyirsiniz. Bu gün isə bunu tam bacarmadığımızı hiss edirəm.
Trasa çıxdığımız andan etibarən çox yaxşı mövqedə idik. Üst komandalarla müqayisədə pit-leynin daha irəli hissəsində boksumuzun olması bizə trasa erkən çıxmaq imkanı verdi. İlk dövrəmdə Fernandoya çox yaxınlaşdım və buna görə ikinci cəhdimi yarımçıq saxlamaq məcburiyyətində qaldım. Beləliklə, performansımı tam ortaya qoya bilmədim. Amma yenə də çox yaxşı nəticə əldə etdik.
Yaş trasda sürüşmə həddindən artıq çox idi. Əslində, izləməyə çalışdığımız iki aydın trayektoriya var, amma tras çox dardır. Kənardan o qədər də aydın görünmür, lakin asfaltın üzərində iki təkər izi var. Biz də həmin izlərin içində qalmağa və tədricən qazı artırmağa çalışırıq. Ancaq bu bolidlər o qədər güclüdür ki, qaz pedalını tam basmaq üçün təxminən beş saniyə vaxt lazımdır.
Su yığılır, sonra isə daha hamar bir səth yaranır. Əslində, sürüşkən hissələrdən keçərkən bolid hərəkət edir, təkər izlərinin olduğu yerə çatanda isə ilişmə xeyli yaxşılaşır.
Daha yaxşı nəticə göstərə biləcəyimizi və ilk iki yer uğrunda mübarizə apara biləcəyimizi düşünürəm. Lakin bunu heç vaxt dəqiq bilmək mümkün deyil. Yağış da güclənirdi və Q3-ün sonunda nələrin baş verəcəyini proqnozlaşdırmaq çətin idi.
Digər pilotların dövrələrini nə vaxt tamamladığını bilmirəm. Ancaq yalnız bir cəhd edə bildiyimizi nəzərə alsaq, məncə, kifayət qədər yaxşı iş gördük.
Bu gün həm yaş, həm də quru trasda sürətli idik. Bununla belə, bizi çətin yarış gözləyir. Mübarizənin tamamilə quru trasda keçməsi ehtimalı azdır, amma istənilən şəraitdə sürətli bolidə sahib olduğumuza inanıram”.
Şərh əlavə et