Kokpit.az xatırladır ki, McLaren komandası bu həftəsonu MCL38-ə böyük yenilik paketi gətirib və burada bolidin asfaltayatma qüvvəsini artıran çoxlu aerodinamik detal olub. “Narıncılar” həftəsonu ərzində yaxşı performans göstərsələr də, real potensiallarını nümayiş etdirə bilməyiblər.
Bütün yeniliklərə sahib olan Lando Norris sprint sıralanma turunun ilk iki sessiyasında zirvədə olsa da, son sessiyada pis dövrə ilə 9-cu olub. Sprint yarışının startında isə Strollun təması ilə mübarizəni dayandırıb. Əsas yarışın sıralanma turunda isə istədiyini ala bilməyib və beşinci olub.
Lando Norris: “Yaxşıdır. Gözlədiyimiz kimi işləyir, amma məncə bura bolidin real potensialını görəcəyimiz tras deyil. Ümid edirəm ki, İmolada ya da başqa trasda bolidin real potensialını bir az göstərə bilərik. Amma doğru yöndə addım atmışıq. Komanda bu yenilikləri hazırlamaqla əla iş gördü.
Yeniliklərin effektini bir sessiyada ya da bir trasda görə bilməzsiniz. Yeksək asfaltayatma tələb edən qüvvəli trasları, aşağı asfaltayatma tələb edən trasları və digər halları görməliyik. İnsanlar hər şeyi bir tras ya da bir sessiya ilə dəyərləndirərək səhv edirlər. Məncə, insanlar mühakimə etməmişdən əvvəl səbirli olmalı və iki-üç həftə gözləməlidirlər. İşə yaradığını bilirik, amma real təsirinin görmək üçün daha çox vaxta ehtiyacımız var”.
Şərh əlavə et