Ferrari-də Lyuis Həmilton və Şarl Lekler arasındakı komanda daxili balans Meksika Qran Prisində yarışın ilk dövrələrində yaşanan mübarizədən sonra yenidən müzakirə mövzusuna çevrilmişdi. Komanda rəhbəri Fred Vassyör Braziliya Qran Prisi öncəsi hər iki pilotla görüşərək aralarında xüsusi komanda əmrləri tətbiq etməyi düşünmədiyini açıqlamışdı.
Sky Sport Deutschland və RTL-yə müsahibəsində bu məsələyə münasibət bildirən Berni Ekklstoun xüsusilə Həmiltonu tənqid edib.
Berni Ekklstoun: “Maşına əyləşib yarışa başlayan kimi, hələ ilk döngəyə çatmamış nədənsə şikayət etməyə və narazılığını bildirməyə başlayır.
Artıq təqaüdə çıxmaq barədə düşünməli olduğu yaşlara çatır”.
Lekler haqqında danışan Ekklstoun isə monakolu pilotun Ferrari ilə daha güclü bağa malik olduğunu vurğulayıb: “Lekler əsl Ferrari adamıdır. Həmilton isə komandaya gəldi və oradakı iş prinsiplərini dəyişməyə çalışdı. Lakin bunu etmək üçün artıq gecdir.
Ferrari-nin aşkar birinci pilota ehtiyacı var. Əsl birinci pilotun və kifayət qədər rəqabətədavamlı ikinci pilotun olması daha yaxşıdır. Ancaq ikinci pilot da öz rolunu dəqiq bilməli və komanda üçün etibarlı dəstək olmalıdır”.
Ekklstoundan Mercedes-in gənc pilotu Andrea Kimi Antonellinin gələcəkdə Ferrari-yə keçmək ehtimalı barədə də soruşulub. O isə ironik cavab verib: “Bunun üçün onun 50 yaşını keçməsini gözləməliyik! Yalnız bundan sonra Ferrari onun üçün yaxşı seçim olar”.






Şərh əlavə et