2026-cı il qaydalarının ilk 11 yarışının 8-də qalib gələn və debüt mövsümündən sonra inkişaf edən Kimi Antonelli ilə çempionata liderlik edən Mercedes yeni qaydalar dövründə üstünlük nümayiş etdirib. Lakin son beş yarışda Ferrari-nin iki, McLaren-in isə bir qələbə qazanaraq fərqi azaltması paddokda mühərrik gücü ilə bağlı müzakirələri yenidən gündəmə gətirib.
2014-cü ildəki qaydalar dövründə nümayiş etdirdikləri böyük üstünlüyün bu dəfə təkrarlanmayacağını bildirən Toto Volff RacingNews365-ə müsahibəsində rəqabətin hazırkı vəziyyətini belə dəyərləndirib: “2014-cü ildə hibrid dövrünün əvvəlində bizi bu qədər dominant edən əsas amil mühərrikimizin uzun müddət ərzində rəqiblərimizdən böyük fərqlə üstün olması idi.
Bu gün isə Ferrari-nin bizə son dərəcə yaxın olduğunu görə bilərsiniz. Bolidin sazlanmasında kiçik bir səhvə yol verdiyinizdə və ya rəqibinizin gətirdiyi yeniliyə cavab verə bilmədiyinizdə dərhal geriyə düşürsünüz. Buna görə də düşünmürəm ki, Formula 1-də artıq həmin səviyyədə üstünlük dövrünü görəcəyik”.
FIA-nın geridə qalan istehsalçılara kömək məqsədilə tətbiq etdiyi ADUO (Əlavə İnkişaf İmkanları) sistemi çərçivəsində daxiliyanma mühərriklərinin göstəricilərində Red Bull-un ən güclü istehsalçı kimi müəyyənləşdirildiyini xatırladan Volff rəqiblərinin performansı barədə də danışıb: “FIA-nın məlumatlarına görə daxiliyanma mühərriki baxımından ən güclü istehsalçı Red Bull-dur. Kompleks paketə baxdıqda isə bəlkə də ən yaxşısı bizik. Bunu qəbul edə bilərəm
Ferrari isə mühərriklərinin ən güclü olmadığını deyə-deyə qalıb, sanki bundan şikayətlənirlər. Halbuki onların kifayət qədər rəqabətqabiliyyətli güc qurğuları var. Sadəcə bolidlərini yüksək asfaltayatma qüvvəsinə fokuslanaraq və egzoz çıxışını bağlayan qanadcıqlarla hazırlayıblar.
Məncə, hazırda pelotondakı əsas güc qurğularının performans səviyyələri demək olar ki, tamamilə bərabərdir”.
Şərh əlavə et