Avqust ayında təqvimdə yay fasiləsinin başlaması ilə komandalar və pilotlar gələn mövsümlə bağlı planlarını dəqiqləşdirməyə başlayarkən, Rafael Kamaranın F2-dəki güclü çıxışı braziliyalı pilotu Formula 1-ə yüksəlmək üçün əsas namizədlərdən birinə çevirib.
Braziliyalı sürücünün gələn mövsüm tamhüquqlu F1 pilotu olaraq arzusunu reallaşdıra biləcəyi ilə bağlı söz-söhbətlər də getdikcə güclənir.
Rafael Kamara F2-yə verdiyi müsahibədə bu iddialarla bağlı belə danışıb: “Bunları görmək xoşdur. Hazırda həqiqətən nələrin baş verəcəyini bilmirsiniz, amma bu cür məsələlərin müzakirə olunması və bu ehtimalın yaxın olduğunu görmək gözəldir.
Ancaq eyni zamanda bunlara həddindən artıq köklənmək istəmirəm, çünki hələ də çox vacib bir çempionatda mübarizə aparıram. Yaxşı çıxış etsəm, böyük ehtimalla şans qazanacağam. Buna görə də öz adıma yalnız bu mövsümə fokuslanıram.
Çox insan belə bir fürsət əldə etmir. Xüsusilə Formula 2-nin ən güclü komandalarından birində yarışaraq çempionluq uğrunda mübarizə aparmaq böyük fürsətdir. Buna görə də bu imkandan maksimum yararlanmaq və hər anın dadını çıxardığımdan əmin olmaq istəyirəm”.
Ferrari Sürücü Akademiyasının üzvü olan Kamaranın Haas ilə adının hallanmasının əsas səbəblərindən biri Amerika komandasının Ferrari ilə yaxın texniki əməkdaşlığı və Maranello təmsilçisinin daha əvvəl gənc pilotlarına Formula 1-də yarışmaq imkanı verməsidir.
Son dövrlərdə yayılan iddialara görə, Ferrari bu təsirindən istifadə edərək 21 yaşlı Kamaranı 2027-ci ildə Esteban Okonun əvəzinə Haas-a gətirə bilər.
Şərh əlavə et