FIA mövsümün əvvəlindən etibarən yeni güc qurğusu və enerji idarəetməsi ilə bağlı ciddi tənqidlərə məruz qalsa da, şassi istiqamətində mühüm dəyişikliklər edib. Yeni qaydalarla bolidlərin təkər bazası (ön və arxa təkərlərin mərkəzləri arasındakı məsafə) 20 santimetr qısaldılıb, eni 10 santimetr azaldılıb və minimum çəkisi 768 kiloqram müəyyənləşdirilib. Bu isə ötən mövsümlə müqayisədə 32 kiloqramlıq azalma deməkdir.
Nikolas Tombazis: “Öndə gedən bolidin arxasındakı hava axınının təqibə təsiri və aerodinamika borusu baxımından 2022-ci ilin əvvəlindəki səviyyəyə bənzər vəziyyətdəyik, lakin bu mövsüm qaydalarımız daha möhkəmdir.
Bu dəfə ön qanadın kənarları və ya altlığın detalları kimi aerodinamik konsepsiyanı tamamilə poza biləcək problemlərin qarşısını ala bildik. Bundan əlavə, bolidlərin hələ də idarə edilməsinin çətin olması sevindiricidir. Dünyanın ən yaxşı 22 pilotunun yarışdığı seriyada bolidlər uşaq oyuncağı qədər asan idarə olunmamalıdır”.
Altlıq effekti olduğu dövrdəki həddindən artıq sərt və alçaq bolidlərlə müqayisədə sürüş hündürlüyünün bir qədər artırılması pilotların fiziki yüklənməsini də müəyyən qədər azaldıb. Tombazis əsas hədəflərinin növbəti qaydalar dövründə həyata keçiriləcəyini bildirib: “Bolidlərin yüngülləşməsi və ölçülərinin kiçilməsi pilotlar tərəfindən müsbət qarşılanıb. Lakin etmək istədiklərimiz bununla məhdudlaşmır.
Növbəti qaydalar dövründə bolidləri 80 kiloqram daha yüngülləşdirməyi, bir qədər qısaltmağı və ölçülərini daha da azaltmağı hədəfləyirik. Qarşıdakı dövrdə bu istiqamətdə radikal addımlar atacağıq. Hazırkı dəyişiklik yaxşı başlanğıcdır, lakin işimiz hələ bitməyib”.
Şərh əlavə et