Yay fasiləsindən sonra Zandfort avtodromunda Niderland Qran Prisi mövcud müqaviləyə görə sonuncu dəfə keçiriləcək. Ölkə Formula 1 yarışlarını qəbul etməyi dayandıranda bu, avtoidmanın, o cümlədən milli avtoidmanın populyarlığına mənfi təsir edən daha bir amilə çevriləcək.
Ferstappen hesab edir ki, Niderland hökuməti vəziyyətə hansısa formada müdaxilə etməli və ölkənin yarış ictimaiyyətinə dəstək göstərməlidir.
Niderlandda avtoidmanın sürətlə inkişaf etdiyi dövr artıq keçmişdə qalıb. Vaxtilə buna Ferstappenin Formula 1-də çoxsaylı qələbələri təkan verib. Bununla yanaşı, beş il əvvəl Formula E-də titul qazanan, hazırda isə təkcə elektrik seriyasında deyil, dözümlülük yarışları üzrə dünya çempionatında da kifayət qədər uğurla çıxış edən Nik de Vritsi də qeyd etmək lazımdır.
Əvvəlki illərdə bu ölkədə avtoidmanın populyarlığı zirvədə olub, lakin indi davamlı şəkildə azalır və dördqat dünya çempionu anlayır ki, buna təsir etmək onun səlahiyyətində deyil.
Maks Ferstappen: “Bu, məndən asılı deyil. Populyarlıq əsasən istedadlı və perspektivli sürücülərin ortaya çıxmasından asılıdır və ümid edək ki, onlardan kimsə Formula 1-ə yol tapa biləcək. Çünki ümumi marağa ən çox məhz bu təsir edir. Həmişə müəyyən təsadüflər də rol oynayır. Gəlin yaxın keçmişdə Almaniyada nə baş verdiyini xatırlayaq”.
Almaniya nümunəsi doğrudan da kifayət qədər yaxşı göstəricidir: vaxtilə Formula 1-də eyni anda bir neçə almaniyalı sürücü çıxış edib, milli Qran Pri keçirilib və böyük azarkeş ordusu olub. Lakin sonuncu Almaniya Qran Prisi 2019-cu ildə keçirilib, dünya çempionatında sürücülərdən isə yalnız 38 yaşlı Niko Hülkenberq qalıb. İndi Audi-nin zavod komandası peyda olsa da, avtoidmana maraq azalmağa davam edir.
Ferstappen ümid edir ki, onun ölkəsində vəziyyət bu həddə çatmayacaq və Niderland hökuməti milli avtoidmanı dəstəkləmək üçün hansısa tədbirlər görəcək: “Ümid edirəm, hökumət də müdaxilə edəcək. Müəyyən dövrlərdə belə dəstək çox vacibdir.
Hamı avtoidmanın nə verə biləcəyini görür. Amma Almaniyanı xatırlasaq, orada hamı “yaşıllar”a qoşulmaq istəyir, bununla belə, ən böyük avtomobil konsernləri də Almaniyada yerləşir. Ona görə də oradakı vəziyyət qeyri-sabit haldadır.
Xoşbəxtlikdən, orada hələ də əla yarışlar keçirilir, məsələn, “Nürburqrinqin 24 saatı”, hərçənd hətta belə yarışları keçirmək də getdikcə çətinləşir”.
Şərh əlavə et