Mövsümöncəsi Barselonadakı testləri istehsalat gecikmələri səbəbindən buraxan Williams bolidində çəki və balans problemləri hələ də özünü göstərməkdə davam edir. Son olaraq Macarıstan Qran Prisində hər iki bolidin də sıralanma turunun ilk sessiyasında (Q1) mübarizəni dayandırması və yarışı 17-ci və 18-ci pillələrdə başa vurması nəticəsində Williams Mühəndislər Kubokunda Audinin də gerisinə düşüb.
Yay fasiləsinin başlaması ilə sosial media hesabı vasitəsilə azarkeşlərə müraciət edən Ceyms Voulz trasdakı nəticələrin ürəkaçan olmadığını etiraf etsə də, bazada görülən gərgin işə diqqət çəkib: “Komandalara enerji toplamaq imkanı verən bu fasilə hamımız üçün çox faydalı olacaq.
Trasdakı nəticələrimiz arxa planda görülən böyük işi tam əks etdirməsə də, bu istirahət dövrü çox uyğun vaxta təsadüf etdi. Yenidən xal qazanan komandalar sırasına qayıtmaq üçün ilboyu əlimizdən gələni etdik”.
Komanda daxilində həyata keçirilən struktur dəyişikliklərinin orta və uzunmüddətli perspektivdə mütləq nəticə verəcəyini vurğulayan Voulz sözlərini belə tamamlayıb: “Bu müddətdə etdiyimiz bir çox müsbət dəyişiklik kənardan baxanda görünməyə bilər. Amma arxa planda bizi hər il daha da irəli aparacaq çox güclü inkişaf addımları atırıq.
Yay fasiləsi ərzində həm dincələcək, həm də inkişaf etdirməli olduğumuz sahələri qiymətləndirəcəyik. Söz veririk ki, bolidimizə qazandıra biləcəyimiz hər millisaniyə üçün əlimizdən gələni edəcəyik.
Mövsümün ikinci yarısını güclü şəkildə başa vurmaq üçün trasa daha enerjili qayıdacağıq”.
Şərh əlavə et