Aprilia Racing açıqlayıb ki, ilkin müayinələr zamanı sürücünün bədənində açıq-aşkar sınıq aşkarlanmayıb. Buna baxmayaraq, əlavə yoxlamalar üçün Barselonadakı Dexeus Universitet Xəstəxanasına göndərilməsi qərara alınıb.
2024-cü ilin Dünya Çempionu olan Martin Kataloniya həftəsonunda ardıcıl problemlərlə üzləşib. Cümə günü ilk sərbəst yürüş sessiyasında qəza keçirən ispaniyalı sürücü 12-ci döngədə motosikletinin altında qalmışdı. Martin sonradan açıqlamasında həmin anın ona 10 il əvvəl eyni trasda həyatını itirən Luis Salom qəzasını xatırlatdığını deyib.
Sıralanma turlarında da qəza edən Martin sprint yarışında altıncı yerdə gedərkən yıxılmışdı. Bazar yarışının ikinci startında isə Raul Fernandes ilə təmasdan sonra yenidən qəza edərək xal şansını itirib.
Bir həftə əvvəl Le Manda Aprilia ilə ikiqat qələbə qazanan Martinin Barselonadakı ümumi qəza sayı test sessiyasındakı son hadisə ilə birlikdə altıya çatıb.
Bazar ertəsi keçirilən testlərin ikinci saatında Martin 7-ci döngədə qəza edib. Hadisədən sonra sessiya qısa müddətlik qırmızı bayraqla dayandırılıb. Trasdan gələn məlumatlarda sürücünün boyunluq taxılmış halda təcili yardım maşını ilə tibbi mərkəzə aparıldığı bildirilib.
Aprilia komandası açıqlamasında bunları deyib: “7-ci döngədəki qəzadan sonra Xorxe Martin əvvəlcə sol dirsəyi və sağ ayağındakı yoxlamalar üçün trasın tibbi mərkəzinə aparılıb. İlkin müayinələrdə görünən sınıq aşkarlanmayıb, lakin daha geniş testlər üçün xəstəxanaya göndərilməsinə qərar verilib”.
Digər tərəfdən, Gresini Racing komandası Aleks Markesin uğurlu əməliyyat keçirdiyini və gün ərzində xəstəxanadan buraxılacağını açıqlayıb.
LCR Honda isə birinci döngədəki qəzanın ardından Yohan Zarkonun vəziyyəti ilə bağlı hələ yeni məlumat paylaşmayıb.
Şərh əlavə et