Bütün Mercedes azarkeşlərini təbrik edirəm! Beş il gözləmək az müddət deyil. Xüsusilə də vaxtilə ardıcıl titullar qazanan bir komanda üçün. Amma indi «Gümüşü oxlar» yenidən öz yerindədir. Doqquzuncu titul da artıq tarixə düşdü.
400-cü yarışda Həmiltonun bəxti gətirmədi
Keçək yarışa. Kağız üzərində bizi kifayət qədər maraqlı mənzərə gözləyirdi. Birinci və sonuncu start cərgələrində iki dünya çempionu yan-yana dayanmışdı. Bir tərəfdə Lando Norris və Kimi Antonelli, digər tərəfdə isə Lyuis Həmilton və Maks Ferstappen. Belə start düzülüşü ilə darıxdırıcı yarış gözləmək çətin idi.
İlk 15 dövrə də gözləntiləri doğrultdu. Həmilton və Ferstappen əla start götürərək ön sıralara doğru irəliləməyə başladılar. Xüsusilə Maksın ilk dövrələrdəki tempi diqqət çəkirdi. Ancaq Həmilton üçün hər şey istədiyi kimi getmədi. Ferrari-də arxa təkərlərin sürətlə yeyilməsi britaniyalı pilotun 400-cü yarışında əsl fenomenal çıxış göstərməsinə mane oldu.
Əslində, Lyuisin startdakı sürəti bizə onun hələ də nələrə qadir olduğunu göstərdi. Sadəcə Ferrari-nin təkərlərlə bağlı problemləri bu dəfə ona lazım olan imkanı vermədi. 400-cü Qran Pri üçün daha yaxşı ssenari arzulamaq olardı.
Ferstappen isə keçən ilki ssenarini təkrarladı. Yenə gerilərdən başladı, yenə rəqiblərini bir-bir geridə qoydu və yenə İnterlaqos podiumuna yüksəldi. Bununla da ardıcıl dördüncü il Braziliyada fəxri kürsüdə yer aldı.
Maksın bu trasdakı çıxışına baxanda adama elə gəlir ki, o, Formula 1 oyununda çətinlik səviyyəsini ən asan rejimə qoyub. Rəqiblər mübarizə aparır, təkərlər yeyilir, hava dəyişir, Maks isə sanki bunların heç birinə əhəmiyyət vermədən öz işini görür. Onun üçün geridən başlamaq belə xüsusi problem deyil. İnterlaqos artıq Ferstappenin şəxsi oyun meydançasına çevrilib.
Norris dünya çempionu kimi sürdü
İndi keçək ön cərgədəki dünya çempionlarına. Lando Norris yenə startda mövqeyini itirdi. Britaniyalının startlarla bağlı problemi artıq ayrıca müzakirə mövzusuna çevrilib. Amma bu dəfə sonrakı mərhələdə hər şeyi yoluna qoymağı bacardı.
Norris stabil sürdü, səhvlərə yol vermədi və Antonellinin yaş trasdan quru şəraitə keçiddə yaşadığı çətinliklərdən maksimum yararlandı. Kimi quru təkərlərə keçəndən sonra dəyişən tras şəraitinə uyğunlaşmaqda çətinlik çəkdi. Lando isə fürsəti əldən vermədi və yarışı qazandı.
Beləliklə, Norrisin mövsümdə üçüncü qələbəsi gəldi. Dünya çempionuna yaraşan performans idi. Startda mövqeyini itirsə də, yarışın gedişində soyuqqanlılığını qorudu və lazım olan anda hücum etdi. Çempionluq qazandıqdan sonra da sürətini itirmədiyini göstərdi.
Amma bir xahişim var: kaş podiumda şampan butulkasını duza döndərməsəydi!
Antonelli və müasir pilotların yağış problemi
Kimi Antonelli isə bu yarışda müasir Formula 1 pilotlarının yağışlı şəraitdə yaşadığı problemləri bir daha nümayiş etdirdi.
Məncə, burada FİA-nın da müəyyən məsuliyyəti var. Son illərdə trasın üzərinə bir az artıq su düşən kimi qırmızı bayraqların çıxarılması pilotların yağışlı şəraitdə sürmək təcrübəsini azaldır. Nəticədə sürücülər dəyişkən hava şəraitinə uyğunlaşmaqda çətinlik çəkirlər. Halbuki yağışda sürmək də Formula 1 pilotunun bacarıqlarından biri olmalıdır.
Antonelli quru təkərlərə keçdikdən sonra trasın dəyişən vəziyyətinə uyğunlaşa bilmədi. Onuncu qələbə üçün əla fürsəti var idi, amma bu dəfə təcrübə çatışmazlığı özünü göstərdi. Sonradan sürətini artırsa da, yağış yenidən başladı və Kimi bu dəfə komanda yoldaşına da mövqeyini uduzdu.
Əlbəttə, Antonelli hələ çox gəncdir. Belə yarışlardan dərs çıxarmaq onun inkişafı üçün vacibdir. Ancaq ümumi tendensiya narahatlıq doğurur. Əgər pilotlar yağışda sürmək üçün kifayət qədər imkan əldə etmirlərsə, bir neçə ildən sonra həqiqətən də yağış şəraitində güclü çıxış edə bilən sürücüləri barmaqla saymalı olacağıq. Bəlkə də gələcəkdə yağışlı yarışlar deyil, yağışlı qırmızı bayraqlar görəcəyik.
Hacar qələbəyə nə qədər yaxın idi?
Ayzek Hacar isə yarışın müəyyən mərhələsində qələbənin ən böyük favoritlərindən birinə çevrildi. Hətta Maks Ferstappenlə eyni tempdə hərəkət edirdi. Bu, onun üçün möhtəşəm fürsət idi. Bir müddət elə görünürdü ki, Red Bull-un gənc pilotu karyerasının ilk qələbəsinə doğru gedir.
Təəssüf ki, alınmadı. Ancaq Hacarın çıxışını yüksək qiymətləndirmək lazımdır. Belə çətin şəraitdə, bu qədər təcrübəli pilotların arasında qələbə uğrunda mübarizə aparmaq özü böyük nəticədir. Əgər bu performansını davam etdirə bilsə, gələcəkdə daha böyük uğurlar qazanacağına şübhə yoxdur.
Rassell, bəs bu nə idi?
Gələk Corc Rassellə. Britaniyalı pilotun pit yolunda yerində fırlanması, böyük ehtimalla, ona ikinciliyə başa gəldi. Belə səhvlər yarışın ən vacib məqamında ediləndə nəticəyə ciddi təsir göstərir.
Son vaxtlar Mercedes-in Rassellə qarşı ədalətsiz davrandığı, komandanın Antonellini önə çəkdiyi barədə müxtəlif şayiələr dolaşır. Ancaq bu vəziyyətdə həmin iddiaları başa düşmək çətindir. Mercedes niyə Rassellə mane olsun ki? Əksinə, komanda Sürücülər Çempionatında ilk iki yeri tutmaqda maraqlı olmalıdır. İki pilotunun da mümkün qədər yüksək nəticə qazanması Mercedes üçün daha sərfəlidir.
Üstəlik, artıq yeddi illik Formula 1 təcrübəsi olan pilotun belə sadə səhv etməsi vəziyyəti daha da çətinləşdirir. Özünü təmizə çıxarmaq üçün komandadan şikayət etmək olar, amma trasda edilən səhvlərin izahı yoxdur. Rassellin bu cür məqamları öz üzərinə götürməsi daha düzgün olardı.
Formula 1-də reputasiyanı qorumaq üçün təkcə sürətli olmaq kifayət etmir. Xüsusilə də komanda yoldaşın Dünya Çempionu olduqda və sən onunla eyni boliddə yarışdıqda hər səhvin daha çox diqqət çəkir.
Mercedes üçün möhtəşəm bazar günü
Beləliklə, Braziliya Mercedes üçün əsl bayramla başa çatdı. Komanda beş illik fasilədən sonra Mühəndislər Kubokunu qazandı, Antonelli yenə podiuma yüksəldi və «gümüşü oxlar» mövsümün əsas hədəfinə çatdı.
Norris isə Dünya Çempionu kimi növbəti qələbəsini qazandı. Ferstappen gerilərdən gəlib yenə podiuma çıxdı, Hacar qələbəyə yaxınlaşdı, Həmilton isə 400-cü yarışında texniki problemlərin qurbanı oldu.
İnterlaqos bir daha sübut etdi ki, Formula 1-də heç bir yarış əvvəlcədən yazılmış ssenari üzrə getmir. Bəzən bir pit-stop, bəzən təkər seçimi, bəzən də pilotun kiçik səhvi bütün nəticəni dəyişir.
Amma bu dəfə əsas mükafat Mercedes-in oldu. Doqquzuncu dəfə Mühəndislər Kuboku onların vitrinindədir. Beş illik fasilədən sonra «gümüşü oxlar» yenidən zirvədədir. Görünür, Mercedes-in çempionluqla bağlı hələ deyəcəyi çox söz var.
Şərh əlavə et