Güclü yağış və külək səbəbindən start təxminən 40 dəqiqə təxirə salınıb. Yağışın bir qədər səngiməsindən sonra formasiya dövrəsi başlayıb.
Formasiya dövrəsində poul mövqeyindən start götürən Maks Ferstappen və ikinci yerdəki Lyuis Həmilton bolidlərində problem yaşayıblar. Hər iki bolid gücdən düşüb və pilotlar trasın ortasında yavaşlamalı olublar. Formasiya dövrəsində qaydalara əsasən öndəki bolidi ötmək qadağan olduğundan trasda qısa müddətlik qarışıqlıq yaranıb. Pilotlar problemi radio vasitəsilə komandalarına bildirsələr də, nasazlığın dəqiq səbəbi açıqlanmayıb.
Ayzek Hacar və Lando Norris də döngədə bolidlərinə nəzarəti itirərək çınqıllıq sahəyə çıxıblar.
Lyuis Həmilton bolidini saxlayıb, lakin bir müddət sonra güc geri qayıdıb və britaniyalı pilot formasiya dövrəsini davam etdirib. Serxio Peres və bir neçə digər pilot da bolidlərində yaranan problemlərə görə dayanmalı olublar.
Baş verən problemlərdən sonra FİA start prosedurunun dayandırıldığını açıqlayıb və bolidlər pit yoluna qayıdıblar.
Antonelli radio vasitəsilə “Trasın quruma sürəti həqiqətən inanılmazdır” deyib.
Trasda aparılan işlər başa çatdıqdan və hava şəraiti yaxşılaşdıqdan sonra yarışın startı 11:33-ə təyin edilib.
Saat 11:30-da bolidlər pit yolundan çıxıb və təhlükəsizlik avtomobilinin arxasında dövrələr vurmağa başlayıblar. Təhlükəsizlik avtomobilinin arxasında keçirilən dövrələr yarışın dövrələrinə hesablanıb.
Pyer Qasli yaş trasda bolidinə nəzarəti itirərək fırlanıb və çəmənliyə çıxıb. Bolidi qısa müddətdə yenidən idarə edən Qasli 13-cü yerdə trasa qayıdıb.
3-cü dövrədə pilotlar start cərgəsindəki yerlərini alıb və işıqların sönməsi ilə 55 dövrədən ibarət Bəhreyn Qran Prisi rəsmi olaraq başlayıb.
Antonelli əla start alaraq ilk döngədə liderliyi ələ keçirib. Komanda yoldaşı Corc Rassell də onu izləyərək ikinci yerə yüksəlib. Beləliklə, poul mövqeyindəki Maks Ferstappen hələ ilk döngəyə çatmamış üçüncü yerə geriləyib.
Ferrari pilotları da startda problem yaşayıblar. İkinci yerdən başlayan Lyuis Həmilton 15-ci yerə qədər geriləyib. Lekler isə Niko Hülkenberqlə təmasdan sonra ön qanadını zədələyib və temp itirib.
Keçid təkərlərinə üstünlük verən komandalar yarışda qalmağı bacarıblar. Həmilton komandaya Soft təkərlərlə trasda qalmaq istədiyini bildirib və pit-stop etməyib.
Lekler isə 10-cu yerdə olsa da, zədə səbəbindən qısa müddət sonra pitə girməli olub və trasa sonuncu yerdə qayıdıb.
4-cü dövrədə Fernando Alonso Həmiltonu geridə qoyaraq 16-cı yerə yüksəlib.
Ferstappen 6-cı dövrədə Rasselli geridə qoyaraq ikinci yerə yüksəlib və Antonellidən 2,3 saniyə geridə hərəkət etməyə başlayıb.
8-ci dövrədə Maks Ferstappen Kimi Antonellini geridə qoyub. Lakin Antonelli qısa müddətdə əks-hücum edərək liderliyi geri alıb. Növbəti dövrənin ilk döngələrində də ikili arasındakı mübarizə davam edib.
Ferstappen düzlüklərdən birində ötməyə cəhd göstərib, lakin Antonelli geniş trayektoriyaya çıxaraq Ferstappenin xəttini pozub. Liderlik uğrunda mübarizə davam etdiyi vaxt Valtteri Bottas qəza edib və təhlükəsizlik avtomobili trasa çıxıb.
Təhlükəsizlik avtomobili rejimində pitə ilk girənlər Rassell, Antonelli və Ferstappen olublar. Daha sonra digər pilotlar da pit-stop ediblər.
Pit-stoplardan sonra Antonelli və Rassell Medium, Ferstappen isə Soft təkərlərlə trasa qayıdıb. Həmilton isə pitə girməyib və yumşaq təkərlərlə yarışa davam edib.
Təhlükəsizlik avtomobili arxasında keçirilən dövrələrdən sonra yarış 13-cü dövrədə bərpa olunub. Ferstappen bolidini xarici trayektoriyada sakit şəkildə yerləşdirərək 3-cü döngədə Antonellini geridə qoyub və liderliyi ələ keçirib. Qısa müddət sonra Rassell də Antonellini keçərək ikinci yerə yüksəlib.
14-cü dövrədə orta təkərlərdən istifadə edən Mercedes pilotları ikinci və üçüncü yerlərdə qalarkən, yumşaq təkərli Ferstappen yarışın ən sürətli dövrəsini vurub və Rassell ilə arasındakı fərqi təxminən 1 saniyəyə çatdırıb.
15-ci dövrədə sərt təkərlərlə mübarizə aparan Oskar Piastri yumşaq təkərli Qabriel Bortoletonu geridə qoyaraq 8-ci yerə yüksəlib. Həmilton da mövqeyini yaxşılaşdırmağa davam edərək 11-ci yerə yüksəlib və Hülkenberqin arxasında qərarlaşıb. Lekler isə 14-cü yerdə Ləns Strollu izləyib.
17-ci dövrədə Ferstappen tempini artıraraq Rassell ilə arasındakı fərqi 2 saniyəyə çatdırıb. Bortoleto yaşadığı problemlə əlaqədar pitə girib və 21-ci yerə qədər geriləyib. Nəticədə Həmilton 9-cu yerə yüksəlib, Lekler isə 12-ci yerdə Norrisi izləməyə başlayıb.
Trasın böyük hissəsinin quruması yumşaq təkərlərlə mübarizə aparan pilotlara üstünlük verib. 9-cu yerdəki Həmilton qarşısında olan Piastri ilə fərqi yarım saniyədən aşağı salıb. Ferstappen isə Rassell ilə arasındakı fərqi 3 saniyəyə çatdırıb.
18-ci dövrədə Antonelli komandasına Rassellə müqayisədə daha yaxşı tempə sahib olduğunu bildirib və ilk sektorda ən sürətli zamanı qeyd edib. Həmilton Piastri və Lindbladı geridə qoyaraq 7-ci yerə yüksəlib və Okonu təqib etməyə başlayıb.
21-ci dövrədə Antonelli komanda yoldaşı Rasselli geridə qoyaraq ikinci yerə yüksəlib və lider Ferstappendən 4,4 saniyə geridə qərarlaşıb. Həmilton isə Okonu da keçərək 6-cı yerə yüksəlib.
Bortoleto Saynsla yaşadığı insidentdən sonra 10 saniyəlik cərimə alıb.
23-cü dövrədə Lekler Hülkenberq və Norrisi geridə qoyaraq 10-cu yerə yüksəlib. Norris də Hülkenberqi keçərək az fərqlə Lekleri izləməyə başlayıb.
Antonelli döngədə tras tutuşunu itirərək trasdan çıxıb və çəmənlikdəki dirəklərdən birinə çırpılıb. Təmasdan sonra komandasından ön qanadını yoxlamağı istəyən Antonellinin Ferstappenlə arasındakı fərq 8 saniyəyə qədər artıb.
27-ci dövrədə Mercedes təxminən 10 dəqiqə ərzində yenidən yağış yağmasının gözlənildiyini bildirib. Piastri Okonu geridə qoyaraq 7-ci yerə yüksəlib.
29-cu dövrədə Lekler pitə girərək yumşaq təkərlərini yeniləyib. Ferstappen Antonelli ilə arasındakı fərqi 9 saniyəyə çatdırıb. Həmilton isə Piastrini geridə qoyaraq 6-cı yerə yüksəlib.
31-ci dövrədə yaxınlaşan yağış təhlükəsi səbəbindən komandaların əksəriyyəti sərt təkərlərə keçib. Red Bull və Ferrari pilotları yumşaq, Mercedes pilotları isə orta təkərlərlə yarışa davam ediblər.
32-ci dövrədə Həmilton ilk pit-stopunu həyata keçirərək orta təkərlərə keçib. Qarşısında olan Hacar da pitə girib və Həmiltondan əvvəl trasa qayıdaraq mövqeyini qoruyub. Eyni dövrədə Rassell də pitə çağırılıb.
34-cü dövrədə yarış lideri Ferstappen də pitə girərək yenidən yumşaq təkərlərlə trasa qayıdıb. İkinci yerdəki Antonelli də yumşaq təkərlərə keçib və Ferstappendən təxminən 11 saniyə geridə hərəkət etməyə başlayıb.
Orta təkərlərə keçən Həmilton bolidin idarəetmə hissinin çox pis olduğunu bildirib. Alonso Hülkenberqi geridə qoyaraq 10-cu yerə yüksəlib.
39-cu dövrədə Həmilton Hacarla arasındakı fərqi yarım saniyədən aşağı salaraq ötmə fürsəti axtarıb. Lakin Hacar trayektoriyasını uğurla qoruyaraq müdafiə olunmağı bacarıb.
43-cü dövrədə Aleks Albon sürətlər qutusunda yaranan problemdən sonra bolidini trasın kənarında saxlayıb və virtual təhlükəsizlik avtomobili rejimi elan olunub. Ferstappen vaxt itirmədən pitə girərək təkərlərini dəyişib. Antonelli isə pitə girməyib və liderliyi ələ keçirib.
Virtual təhlükəsizlik avtomobili rejimində Ferrari pilotları da pitə giriblər. Bir müddət sonra Mercedes pilotları və Hacar da pitə daxil olublar və Ferstappen yenidən yarış liderliyinə yüksəlib.
46-cı dövrədə Albonun sürətlər qutusunda yaranan problem səbəbindən bolidi itələməklə trasdan çıxarmaq mümkün olmayıb. Vinçin gəlməsi ilə virtual təhlükəsizlik avtomobili rejimi təhlükəsizlik avtomobili rejimi ilə əvəzlənib. Təhlükəsizlik avtomobili trasda olduğu müddətdə McLaren pilotları da pitə girərək yumşaq təkərlərə keçiblər.
Rassell təhlükəsizlik avtomobili rejimi zamanı bolidində yaranan problemə görə trasın kənarında dayanıb və yarışı başa vura bilməyib. Rassellin yarışdan çıxması Antonelli üzərindəki təzyiqi azaldıb, Hacar isə podiumun son pilləsinə yüksəlib. Rassellin probleminin dəqiq səbəbi bilinməsə də, Mercedes bunun güc qurğusu ilə əlaqəli ola biləcəyini bildirib.
Rassellin bolidi tras işçiləri tərəfindən itələnərək qaraja aparılıb.
Təhlükəsizlik avtomobili trasa geri qayıtdıqdan sonra yarış 52-ci dövrədə bərpa olunub.
2026-cı ildə ilk qələbəsini axtaran Ferstappen yaşıl bayraqlarla birlikdə tempini artırıb və ilk döngələrdə liderliyini qoruyub. Piastri Lousonu geridə qoyaraq 6-cı yerə yüksəlib.
Ferstappen 53-cü dövrəyə Antonellidən 1 saniyə fərqlə lider daxil olub.
Həmilton Hacar üzərində təzyiqi artıraraq son düzlükdə ötmə manevri edib və podiumun son pilləsinə yüksəlib. Qısa müddətdə fərqi 1 saniyədən çoxa çatdıraraq mövqeyini qoruyub.
Ferstappen 53-cü dövrədə Antonelli ilə arasındakı fərqi bir qədər də artırıb.
54-cü dövrədə Lekler də Hacarı geridə qoyaraq 4-cü yerə yüksəlib.
Ferstappen son dövrədə Antonelli ilə arasındakı fərqi 1,5 saniyəyə çatdıraraq damalı bayrağı ilk keçib və 2026-cı il mövsümündə ilk qələbəsini qazanıb.
Antonelli Həmiltondan 2,3 saniyə öndə ikinci yeri tutub. Həmilton isə yarışın əvvəlində itirdiyi mövqeləri bərpa edərək podiumun son pilləsini tamamlayıb.
Şərh əlavə et