Formula 1 və Disney azarkeşlərə Disney hekayələri vasitəsilə fərqli təcrübələr yaşatmaq üçün 2025-ci ildə “Fuel the Magic” adı altında qlobal əməkdaşlığa başlayıb.
Tərəflər yeni anlaşma ilə bu əməkdaşlığı 2028-ci ilin sonuna qədər uzadıblar. Məşhur “Maşınlar” seriyası da əməkdaşlığın əsas hissələrindən birinə çevrilib.
Qərara əsasən, seriyanın əsas personajı Şimşək MakKuin Monzada keçiriləcək İtaliya Qran-Prisində trasa çıxacaq.
Məşhur personajın yarış həftəsonunda tam olaraq hansı formada təqdim olunacağı hələ məlum deyil. Formula 1-in rəsmi açıqlamasında isə belə deyilir: “Maşınlar seriyası 20 ildir filmlər, xüsusi məhsullar və Disney əyləncə parklarındakı attraksionlarla azarkeşləri həyəcanlandırmağa davam edir.
İndi isə filmlərin yubileyini qeyd etmək üçün yeni görünüşü ilə Monzaya gəlir.
Avtoidmanın ən nüfuzlu yarış həftəsonlarından birində baş tutacaq bu əməkdaşlıq həm film, həm də Formula 1 azarkeşləri üçün unudulmaz anlar yaradacaq”.
Əməkdaşlıq çərçivəsində geyimlərdən tutmuş xüsusi model avtomobillərə qədər geniş çeşiddə yeni Disney və F1 “Maşınlar” kolleksiyası da satışa çıxarılacaq.
Formula 1 və Disney bundan əvvəl Las-Veqas, Çin, Kanada və Böyük Britaniyada birgə tədbirlər keçirib.
Şərh əlavə et