Mövsümöncəsi Barselona testlərini buraxan Williams bolidin çəkisi ilə bağlı problemlər yaşayıb. Bu səbəbdən komanda mövsümün ilk yarışlarında mübarizəyə qoşula bilməyib. Williams hazırda Konstruktorlar Çempionatında doqquzuncu pillədə qərarlaşıb.
Trasdan kənarda idarəetmə ilə bağlı müzakirələrlə də gündəmə gələn Britaniya komandası sabitlik yaratmaq istəyir. Bunun üçün əsas hədəflərdən biri komandanın ən dəyərli pilotlarından sayılan Karlos Saynsın müqaviləsini uzatmaqdır.
Son dövrlərdə adı Alpine və Aston Martin kimi komandalarla hallanan Saynsı komandada saxlamaq üçün Williams rəhbərliyi böyük təklif hazırlayır.
Autosprint-in məlumatına görə, Williams rekord məbləğ təklif etməyə hazırlaşır. Hazırda ildə təxminən 11,5 milyon avro qazanan Saynsa müqaviləsini uzatdığı halda illik 30 milyon avro maaş təklif olunacaq.
Təklif qəbul olunarsa, Saynsın maaşı demək olar ki, üç dəfə artacaq. İspaniyalı pilot bu məbləğlə Fernando Alonso və Corc Rassel kimi pilotları da geridə qoyacaq.
Bu təklif nəticələri aşağı düşən Williams üçün ciddi maliyyə riski hesab olunur. Buna baxmayaraq, komanda Saynsın təcrübəsinə çox güvənir.
Sayns 2025-ci il mövsümündə iki dəfə podiuma çıxıb. Williams onun liderlik xüsusiyyətləri sayəsində komandanın yenidən xal qazanmağa başlamasına kömək edəcəyinə inanır.
Şərh əlavə et