Yeni şassi və mühərrik qaydalarının qüvvəyə mindiyi 2026-cı il F1 mövsümündə Red Bull-un rəqabət qabiliyyəti baxımından geridə qalması Maks Ferstappenin həm komandadan, həm də Formula 1-dən ayrıla biləcəyi ilə bağlı iddiaları gündəmə gətirib. Elektrik mühərrikinin gücünün artırıldığı yeni qaydalar dövrünü ilk gündən sərt şəkildə tənqid edən niderlandlı pilota F1 CEO-su Stefano Domenikalidən cavab gəlib.
Domenikali rəhbərlik olaraq pilotların rəylərini nəzərə aldıqlarını bildirib. O, 2027 və 2028-ci illərdə mühərrik qaydalarında mərhələli dəyişikliklər ediləcəyini və daxiliyanma mühərrikinin payının yenidən artırılacağını bir daha vurğulayıb.
Maks Ferstappenlə yaxın ünsiyyətdə olduqlarını bildirən Stefano Domenikali yeni dəyişikliklərin dünya çempionunu məmnun edəcəyini düşünür: “Gələnilki qayda dəyişikliklərini simulyatorda sınaqdan keçirən pilotlar işlərin doğru istiqamətdə getdiyini deyirlər. Bu məsələni Maksla şəxsən də müzakirə etmişik.
Unutmamalıyıq ki, qaydaları dəyişmək üçün komandaların, istehsalçıların, FIA-nın və Formula 1 rəhbərliyinin ortaq mövqedə olması lazımdır.
Əslində güc balansını dəyişmək məsələsində daha aqressiv davranmaq istəyirdik. Lakin komandalarla aparılan danışıqların nəticəsində mərhələli keçid variantı qəbul edildi”.
Mühərriklərdə güc bölgüsünün mərhələli şəkildə benzin mühərrikinin xeyrinə dəyişdiriləcəyini və 2028-ci ildə Ferstappenin tələb etdiyi səviyyəyə çatacağını bildirən Domenikali sözlərini belə tamamlayıb: “Düşünürəm ki, Maks gələcəkdə ediləcək dəyişikliklərdən çox məmnun qalacaq.
O, Formula 1-i çox sevir və idmanın gələcəyinə önəm verir. Hazırda həm onun, həm də idmanın gələcəyini birlikdə müzakirə edirik. Onunla çox yaxşı münasibətim var.
Formula 1 onu özündə saxlaya biləcək qədər böyük bir təşkilatdır. Lakin günün sonunda Maks gələcəyi ilə bağlı qərarı özü verəcək və idman da yoluna davam edəcək. Mənim şəxsi fikrim Maksın bizimlə qalacağı istiqamətindədir. Buna ürəkdən inanıram və ümid edirəm”.
Şərh əlavə et