Honda yenilənmiş mühərrikdə etdiyi dəyişikliklərin “sirli” detalları barədə məlumat verib. Yeni motor bu ayın sonunda keçiriləcək Niderland Qran Prisində Aston Martin-in bolidinə quraşdırılacaq.
Bu yenilik Aston Martin-in ötən ay Budapeştdə istifadəyə verdiyi öz texniki yeniləməsindən sonra gələcək.
Aston Martin və Honda tərəfdaşlıqlarının ilk ilində müxtəlif problemlərlə üzləşib. Bununla belə, Honda ilk böyük yeniləməsinin performans baxımından irəliyə doğru addım atacağına ümid edir.
Şintaro Orihara: “Biz mühərrikin performansını yaxşılaşdırmağa və yanmanın daha sürətli baş verməsinə diqqət yetirdik.
Bu, bir sirrdir, amma bəzi detalları açıqlaya bilərəm. Yanmanı sürətləndirmək üçün ilkin yanma kamerasını dəyişdirdik. Həmçinin daha yaxşı yanma prosesi əldə etmək üçün porşenin formasını yenilədik.
Sürtünməni azaltmaq məqsədilə yağlama sistemində də bəzi dəyişikliklər etdik. Mühərrikin performansını yaxşılaşdırmaq üçün kifayət qədər uzun dəyişikliklər siyahımız var idi”.
Aston Martin-in öz yeniləməsi performans baxımından nəzərəçarpacaq irəliləyiş gətirib. Honda da yeni mühərrik yeniləməsi ilə oxşar addım atmağa çalışır.
Oriharadan yeniləmənin mühərrikə nə qədər əlavə at gücü qazandıracağını soruşduqda isə o, dəqiq rəqəmi açıqlaya bilməyəcəyini bildirib: “Dəqiq rəqəmi açıqlaya bilmərəm, lakin daxili hədəfimizə çatmışıq.
HRC-nin Sakuradakı zavodunda çalışan əməkdaşların ikinci versiya mühərrik üzərində əldə etdiklərinə əminəm. Yeni versiya mühərriki Niderlanda gətirəcəyimiz üçün həyəcanlıyıq. Bundan sonra harada olduğumuzu görəcəyik”.
Şərh əlavə et