Sabiq Formula 1 pilotu Stefan Yohansson Mercedes-in hər iki çempionatdakı üstünlüyünə baxmayaraq, builki titul mübarizəsinin “hələ çox uzaqda olduğunu” düşünür.
Breklidə yerləşən komanda mövsümə olduqca güclü başlayıb və ilk altı mərhələnin hamısında qələbə qazanıb.
Lakin son yarışlarda rəqib komandalar Mercedes-ə çatmağa başlayıb. Son beş Qran-pridə Ferrari iki, McLaren isə bir qələbə qazanıb.
Bu il Formula 1-də həm aerodinamika, həm də mühərrik qaydalarında böyük dəyişiklikləri nəzərdə tutan yeni texniki reqlament qüvvəyə minib.
Mercedes mövsümün startında rəqiblərindən aşkar şəkildə üstün olsa da, son bir neçə ay ərzində bu fərq getdikcə azalıb. Yohansson hesab edir ki, bu vəziyyət mövsümün ikinci yarısında gərgin mübarizəyə zəmin yaradıb: “Artıq hər şey çox həyəcanvericidir. Aydındır ki, indi mübarizədə birdən çox komanda var.
Düşünürəm ki, illər keçdikcə rəqabət daha da sıxlaşacaq.
Mercedes ilin əvvəlində açıq şəkildə böyük üstünlüyə malik idi. Lakin getdikcə daha çox komanda bolidi necə idarə etməli olduğunu və ümumilikdə avtomobildən necə maksimum yararlanmağın yollarını anlayır. Bu da mübarizənin böyük bir hissəsidir.
Əminəm ki, fərq daha da azalacaq. Məncə, çempionatın taleyi hələ çox uzaqdadır”.
Kimi Antonelli hazırda pilotlar çempionatında Lyuis Həmiltonu 50 xal qabaqlayır. İtaliyalı pilot bu mövsüm artıq altı qələbə qazanaraq liderliyini möhkəmləndirib.
Mercedes isə Konstruktorlar Çempionatında liderliyini davam etdirir. Alman təmsilçisi ən yaxın izləyicisi Ferrari-ni 72 xal qabaqlayır.
Şərh əlavə et