Macarıstan Qran Prisində pit yolunda 80 km/saat sürət həddini cəmi 0,1 km/saat aşdığı üçün 5 saniyəlik cəza alan Həmilton stüardların qərarlarını şübhə altına alıb və Britaniya Qran Prisindəki səhv start cəzasının da yanlış qiymətləndirildiyini iddia edib. Lakin Herbert qaydaların kifayət qədər aydın olduğunu vurğulayaraq hakimləri müdafiə edib.
Həmiltonun mübahisələrə səbəb olan açıqlamalarını dəyərləndirən Conni Herbert dünya çempionu pilotun stüardlar heyətini hədəf almasının düzgün olmadığını bildirib: “Aldığınız cəzaları sadəcə ‘bəxtsizlik’ adlandıra bilməzsiniz. Pilotu sadəcə sevmədiyiniz üçün cəzalandıra bilməzsiniz, sistem belə işləmir. Qaydalar və təlimatlar son dərəcə aydındır. Yarış zamanı otaqda dörd stüard birlikdə və uyğun şəkildə işləyir, onlar qaydaları gözardı edə bilməzlər.
Cəzalarda düzgün qərar vermək əsas məsələdir. Komandaların və pilotların hər zaman tələb etdiyi şey də məhz budur. Məncə, stüardlar əla iş görürlər”.
Macarıstandakı pozuntunun tamamilə pilot səhvi olduğunu vurğulayan Herbert tənqidlərini belə davam etdirib: “Pit yolundakı sürət pozuntusu tamamilə Həmiltonun səhvi idi. Bu məsələyə nöqtə qoymaq lazımdır. Başqa heç kimi günahlandıra bilməzsiniz.
10 il əvvəlki Lyuis yəqin ki, belə bir səhvə yol verməzdi. Hadisəni niyə bu qədər yanlış qiymətləndirdiyini bilmirəm, lakin günün sonunda onun səhvinin heç bir bəhanəsi yoxdur.
Stüardların Lyuisə qarşı pis münasibəti yoxdur. Onsuz da sistem buna imkan vermir. Həmilton belə sadə səhvlərə yol verməməyi öyrənməlidir”.
Şərh əlavə et