Formula 2-də poul mövqeyi üçün əlavə xal verildiyini nəzərə alsaq, Nikola Tsolovun Red Bull Ring-də keçirilən sıralanma turunda fərqlənməyə çalışacağı gözlənilən idi. Çünki o, bu mövsüm hələ heç bir kvalifikasiyada qalib gəlməmişdi. Üstəlik, məhz Avstriyada, Red Bull rəhbərliyinin gözü qarşısında bacarığını göstərmək onun üçün xüsusi əhəmiyyət daşıyırdı.
Sıralanma turu hər mənada isti keçəcəyini vəd edirdi. Təkcə mübarizənin gərginliyinə görə deyil, hava temperaturu 30 dərəcəni keçmiş, asfalt isə 50 dərəcəyədək qızmışdı.
İlk ciddi nəticəni Aleks Dann göstərərək dövrəni 1:16.238 nəticə ilə başa vurub. Lakin az sonra Noel Leon onun vaxtını üstələyib. Nikola Tsolov ilk cəhdində komanda yoldaşından cəmi 0.015 saniyə geri qalıb, Qabriel Mini isə üçüncü pilləyə yüksəlib. Bununla belə, bu nəticələrin hələ ilkin cəhdlər olduğu və tempin artacağı aydın idi.
Invicta Racing komandasının sürətli braziliyalısı Rafael Kamara isə hər üçünü geridə qoyaraq 1 dəqiqə 16 saniyə həddini keçməyə çox yaxınlaşıb. O, buna cəmi 0.052 saniyə uduzub. Bundan sonra sürücülər yeni təkərlər üçün boksa qayıdıblar və poul uğrunda həlledici cəhd irəlidə idi.
Kamaranın bacarmadığını Leon reallaşdırıb. Meksikalı sürücü ilk olaraq yenidən trasa çıxaraq braziliyalının nəticəsini yarım saniyədən çox yaxşılaşdırıb və 1:15.544 nəticə göstərərək yüksək plan müəyyənləşdirib. Aydın idi ki, rəqiblər bununla razılaşmayacaqlar və az sonra hamı trasa qayıdıb.
Qeyd edək ki, ötənilki poul vaxtı bundan da sürətli idi. Həmin vaxt Invicta Racing-in heyətində çıxış edən Leonardo Fornaroli 1:15.229 nəticə ilə sıralanma turunun qalibi olmuşdu.
Həlledici cəhdində Aleks Dann dövrənin ilk hissəsində çox sürətli olsa da, ikinci və üçüncü sektorlarda tempini itirib. Buna baxmayaraq, ikinci pilləyə yüksəlməyi bacarıb. Lakin heç kim Noel Leonun nəticəsini üstələyə bilməyib. Artıq iki yarış qələbəsi olan 21 yaşlı meksikalı bununla karyerasına ilk poul mövqeyini də əlavə edib.
Nikola Tsolov üçüncü yeri tutub ki, bu da pis nəticə sayılmır. Çünki Red Bull Ring ötmələrin mümkün olduğu traslardan biridir. Bolqar pilot bazar günü ikinci cərgədə əsas rəqibi, çempionatın lideri Qabriel Mini ilə yanaşı start alacaq. Bu isə hər mövqe uğrunda prinsipial mübarizə vəd edir.
Şənbə günü keçiriləcək sprint yarışına isə poul mövqeyindən bu gün 10-cu nəticəni göstərən Sebastyan Montoya başlayacaq. Xatırladaq ki, gənclər seriyalarında sprint yarışları üçün qismən reversiv start düzümü tətbiq olunur.
Kolton Herta isə hələ də gözlənilən nəticələri göstərə bilmir. Amerikalı sürücü sıralanma turunda yalnız 20-ci olub. O, hazırda şəxsi hesabda 13-cü pillədə qərarlaşıb və liderdən dörd dəfədən çox az xal toplayıb. Nəzərə alsaq ki, Herta Formula 2-yə təkcə Avropa traslarını daha yaxşı öyrənmək üçün deyil, həm də superlisenziya qazanmaq məqsədilə keçib, hazırkı nəticələrlə həmin planın baş tutmamaq ehtimalı kifayət qədər yüksək görünür.
Şərh əlavə et