Makao şəhərində keçirilən FIA-nın növbədənkənar Baş Assambleyasında dünyanın müxtəlif ölkələrindən gələn üzv klublar və nümayəndələr federasiyanın nizamnaməsi və daxili qaydalarına dair bir sıra dəyişiklikləri təsdiqləyiblər.
FIA-nın iclasın yekunlarına dair yaydığı açıqlamada diqqət çəkən məqamlardan biri də federasiyanın idarəetmə orqanları üçün nəzərdə tutulan müddət məhdudiyyətinin ləğvi olub.
İndiyədək FIA prezidenti və müxtəlif idarəetmə orqanlarının üzvləri üçün ümumilikdə 12 illik fəaliyyət limiti mövcud idi. Yeni qərarla bu məhdudiyyət aradan qaldırılıb.
FIA bildirib ki, bu dəyişiklik Ümumdünya Avtoidman Şurası və FIA Senatı ilə uyğunluğun təmin edilməsi məqsədilə həyata keçirilib. Həmin iki qurumda əvvəllər də müddət məhdudiyyəti tətbiq olunmurdu. Qərarın FIA prezidenti Mohammed Ben Sulayem tərəfindən irəli sürüldüyü və nümayəndələrin böyük əksəriyyətinin dəstəyi ilə qəbul edildiyi bildirilib.
FIA həmçinin prezident seçkilərində iştirak edəcək namizədlər üçün uyğunluq meyarlarını da sərtləşdirib.
Federasiyanın açıqlamasında deyilir: “FIA prezidentliyi üçün uyğunluq meyarları gücləndirilib və prezident siyahısında yer alan digər namizədlər üçün mövcud meyarlarla daha uyğun hala gətirilib”.
Bundan əlavə, Namizədlərin İrəli Sürülməsi Komitəsinin adı “Uyğunluğun Qiymətləndirilməsi Komitəsi” olaraq dəyişdirilib.
Yeni qaydalara əsasən, prezidentliyə namizədlər FIA üzvü olan klubda və ya FIA-nın tərkibində fəaliyyət göstərən təşkilatlardan birində yüksək səviyyəli təcrübəyə malik olduqlarını sübut etməli olacaqlar.
Bu dəyişikliklərin gələcəkdə FIA prezidentliyinə namizəd olmaq istəyən şəxslər üçün daha yüksək tələblər müəyyənləşdirdiyi qeyd olunur. Nəzəri baxımdan, yeni nizamnamə dəyişiklikləri seçkidə məğlub olmadığı və ya yaş həddinə çatmadığı müddətdə fəaliyyətdə olan FIA prezidentinə vəzifəsini müddətsiz davam etdirmək imkanı verir.
Hazırda 64 yaşı olan Mohammed Ben Sulayem 2025-ci ilin sonunda rəqibsiz şəkildə ikinci dördillik prezidentlik müddətinə yenidən seçilib. Yeni qaydalara əsasən o, 2029-cu ildə üçüncü müddət üçün də namizəd ola biləcək. Lakin hazırkı qaydalara görə FIA prezidenti üçün 70 yaş həddi qüvvədə qalır və onun üçüncü müddətin sonunda bu həddə çatacağı gözlənilir.
Qərardan sonra Mohammed Ben Sulayem bunları deyib: “Üzvlərimiz tərəfindən bu gün təsdiqlənən qərarlar federasiya olaraq birlikdə əldə etdiyimiz inkişafı əks etdirir Daha güclü idarəetmə, maliyyə intizamı və aydın uzunmüddətli baxış sayəsində üzvlərimizi daha yaxşı dəstəkləyən, çempionatlarımızı gücləndirən və bütün dünyada avtoidman ilə mobilliyin inkişafına töhfə verən bir FIA qururuq”.
Şərh əlavə et