McLaren komandasının rəhbəri bildirib ki, növbəti mühərrik reqlamenti dövründə V8 mühərriklərinin geri qaytarılması maraqlı variant ola bilər. FIA-nın prezidenti Mohammed Ben Sulayem bu ideyanın normal şərtlərdə 2031-ci ildən tətbiqini təklif etsə də, dəyişikliklərin daha erkən həyata keçirilə biləcəyi ilə bağlı iddialar da mövcuddur.
Bu mövsümdən qüvvəyə minən yeni güc qurğusu qaydaları elektrik enerjisi və batareya gücünə daha çox önəm verdiyi üçün bəksər pilot tərəfindən tənqid olunub. Formula 1-in növbəti mühərrik erasına dair müzakirələr davam etdiyi bir vaxtda Zek Braun eşitdiklərindən məmnun qaldığını bildirib: “Sonda texniki məsələləri mühərrik təchizatçımız Mercedes-ə həvalə etməliyik.
Amma prezidentdən V8 mühərrikləri, daha böyük daxiliyanma mühərriyi, düzgün yanacaq, daha az batareya, daha az hibrid sistem və daha çox səs barədə eşitdiklərimizin hamısı çox cəlbedici səslənir.
Mənim texniki biliklərim bundan o yana keçmir, lakin düşünürəm ki, bunu sınamağa dəyər. Məntiqli qərar kimi görünür”.
McLaren Formula 1-dəki 60 illik tarixində heç vaxt öz güc qurğusunu istehsal etməyib. Buna baxmayaraq, Braun gələcəkdə şərtlər uyğun olarsa, komandanın bu yanaşmasını dəyişə biləcəyinə işarə vurub.
McLaren-in rəhbəri əlavə edib: “Gələcək qaydaların necə formalaşacağını gözləyib görməliyik.
Əgər yeni reqlamentlər bizə maraqlı görünərsə, bəlkə onda bu məsələyə baxarıq. Ancaq hazırda gələcəyin nə gətirəcəyi barədə sizin bildiyiniz qədər məlumatımız var. Bu mərhələdə diqqətimizi bugünkü vəziyyətimizə və gələcəkdə olmaq istədiyimiz nöqtəyə yönəltməkdən başqa hər hansı addım atmaq sadəcə diqqəti yayındırar”.
Hazırda McLaren Mercedes mühərriklərindən istifadə edir və komandanın yaxın gələcəkdə öz güc qurğusunu hazırlaması ilə bağlı konkret plan açıqlanmayıb. Bununla belə, Formula 1-in gələcək mühərrik konsepsiyası ətrafında aparılan müzakirələr bəzi komandaların uzunmüddətli strategiyalarını yenidən nəzərdən keçirməsinə səbəb ola bilər.
Şərh əlavə et