ART komandasında çıxış edən tailandlı sürücü dünənki kvalifikasiyada 10-cu nəticəni göstərmişdi. Bununla belə, çoxları onun liderliyini qoruyacağına inanmırdı, çünki birinci cərgədən təcrübəli paraqvaylı Coşua Dyurksen (Invicta komandası) yarışa başlayırdı.
Startda İntrafuvassak yaxşı çıxış etdi, amma ikinci yerə Oliver Göte yüksəldi və Dyurkseni qabaqladı. Lakin paraqvaylı sürücü artıq ilk dövrədə mövqeyini geri qaytardı. Daha sonra Kuș Maini alman sürücünü keçdi, Göte isə səhv edərək fırlandı.
Artıq ikinci dövrədə Dyurksen 9-cu döngəyə əyləcləmə zamanı cəsarətli manevrlə İntrafuvassakı keçərək liderliyə yüksəldi. Bu vaxt tailandlı sürücünü Maini təqib edirdi. Lakin hindistanlı pilot planını həyata keçirə bilmədi, çünki Noel Leon onu keçərək dördüncü yerə göndərdi. Yeddinci yerdən start alan Leon artıq dörd rəqibini qabaqlamışdı. Bir neçə dövrə sonra Maini ümumiyyətlə ilk beşlikdən də kənara düşdü.
Dyurksen liderliyini qoruyurdu, ancaq ciddi fərq yarada bilmirdi. Onun sarı rəngli Dallara bolidindən təxminən 1,6 saniyə geridə İntrafuvassak gedirdi. Ardınca Leon, Rafael Kamara, Martin Stenshorn və Aleks Dann yerləşirdi.
Liderlər qrupunda ciddi dəyişikliklər olmasa da, pelotonun ortasında mübarizə daha maraqlı idi. Məsələn, ilk dövrələrdə çox mövqe itirən Nikola Tsolov 13-cü gedən Kolton Hertaya hücum edərkən onların maşınları toqquşdu və bolqar sürücü döngədən çıxışda fırlandı. Xoşbəxtlikdən, Red Bull rənglərində olan onun bolidinə heç kim çırpılmadı.
Bu insident stüardların diqqətini çəkdi və qərarın yarışdan sonra veriləcəyi bildirildi. Eyni zamanda stüardlar artıq Martin Stenshorna Tsolovla ilk dövrələrdəki toqquşmaya görə 5 saniyə cərimə tətbiq etdilər – norveçli sürücü onu trasdan kənara sıxışdırmışdı.
15-ci dövrədə Mari Boya qəza etdikdən sonra sarı bayraqlar qaldırıldı və trasda təhlükəsizlik avtomobili göründü. Bu, ispaniyalı sürücünün Melburndakı həftəsonunda ikinci qəzası idi.
Bəzi pilotlar vəziyyətdən istifadə edib boksa girərək təkərləri dəyişdilər. Sprint yarışında bu məcburi deyil. İlk olaraq pitə Kolton Herta girdi. O, onsuz da xal uğrunda mübarizə aparmırdı və yarışın son dövrələrində yeni təkərlərlə daha sürətli getməyi planlaşdırırdı.
18-ci dövrədə restart verildi. Dyurksen liderliyini qorudu, amma az sonra Leon İntrafuvassakı keçərək ikinci yerə yüksəldi.
Yarışın sonuna doğru Sebastyan Montoya da uğursuz kvalifikasiyadan sonra irəliləməyə çalışdı və bir neçə rəqibini keçərək 10-cu yerə qədər yüksəldi. Lakin sprint yarışında yalnız ilk səkkiz sürücü xal qazanır.
İntrafuvassak podiumda qala bilmədi, çünki onu Stenshorn və Dann keçdi. Lakin norveçli sürücünün nəticəsinə 5 saniyə cərimə əlavə olundu və o, yekunda 10-cu yerə düşdü.
Sprint yarışının qalibi Coşua Dyurksen oldu. O, keçən mövsümü də qələbə ilə başa vurmuşdu, lakin o zaman AIX komandasında çıxış edirdi. Bu dəfə isə Invicta komandası və paraqvaylı azarkeşlərini sevindirdi.
Yarışın ilk beşliyi:
- Coşua Dyurksen
- Noel Leon
- Aleks Dann
- Tasanapol İntrafuvassak (debutantlar arasında ən yaxşı nəticə)
- Ritomo Miyata
Kolton Herta isə zədələnmiş ön qanad səbəbindən çətin yarış keçirərək yalnız 16-cı yeri tutdu.
Bazar günü keçiriləcək əsas yarışa isə poul mövqeyindən Dino Beqanoviç start verəcək. Maraqlıdır ki, o, bugünkü sprintdə demək olar ki, görünmədi və yalnız 20-ci yerdə finişə çatdı.
Şərh əlavə et