Səkkiz trasda problemlər olacaq

Ekspertlər dövrə ərzində batareyanın doldurulmasının ən çətin olacağı səkkiz trası müəyyən ediblər.

1. Albert Park – Avstraliya Qran Prisi (Melburn)

Albert Park Circuit

Melburndakı trasda əsas problem birinci döngədən əvvəlki əsas əyləcləmədir. Batareyanı doldurmaq üçün yüksək sürətdən kəskin əyləc lazımdır və bu cür şərait əsasən yalnız burada mövcuddur. Trasda orta və yüksək sürətli döngələr çoxdur, uzun və kəskin əyləcləmə zonaları isə azdır.

2. Suzuka – Yaponiya Qran Prisi

Suzuka Circuit

Başlanğıcdakı məşhur “S” döngələrində ciddi əyləcləmə yoxdur. Degner-in qarşısında qısa əyləcləmə mövcuddur, 130R isə demək olar ki, tam qazla keçilir. Əsas enerji bərpası imkanı yalnız son şikandadır.

3. Ciddə – Səudiyyə Ərəbistanı Qran Prisi

Jeddah Corniche Circuit

Sürətli və axıcı şəhər trasıdır. Ən yaxşı enerji toplama nöqtəsi birinci döngədən əvvəlki əyləcləmədir. Qalan hissədə əsasən yüngül əyləc toxunuşları var, bu da batareyanın bərpasını çətinləşdirir.

4. Monreal – Kanada Qran Prisi

Circuit Gilles Villeneuve

Orta sürətli döngələr və uzun düzlüklər üstünlük təşkil edir. İkinci döngə, sancaq və son şikanda əyləcləmə zonaları mövcuddur, lakin digər hissələrdə enerji toplamaq çətindir.

5. Spa – Belçika Qran Prisi

Təqvimin ən uzun trasıdır. Birinci sektor demək olar ki, tam qazla keçilir. Les Combes və Bruxelles döngələrində müəyyən enerji toplamaq mümkündür, lakin ümumilikdə uzun düzlüklər batareyanın boşalmasına səbəb olur.

6. Monza – İtaliya Qran Prisi

Autodromo Nazionale Monza

Uzun və sürətli düzlüklər, az sayda ciddi əyləcləmə zonası. Sıralanma turunda batareyanı maksimum boşaltmaq mümkün olsa da, yarış məsafəsində enerji qənaəti əsas faktora çevriləcək.

7. Bakı – Azərbaycan Qran Prisi

Baku City Circuit

2,2 kilometrlik əsas düzlüklə seçilir. Dövrənin ortasında da uzun düz hissələr var. İkinci yarıda enerji bərpası çətinləşir və sürücülər taktiki yanaşma sərgiləməlidirlər.

8. Las Veqas – Las Veqas Qran Prisi

Las Vegas Strip Circuit

Təxminən 1,9 km-lik uzun düzlüklə fərqlənir. Birinci döngə və 5–9-cu döngələr arasında enerji toplamaq mümkündür, lakin ümumilikdə batareya idarəçiliyi burada da həlledici rol oynayacaq.

Beləliklə, 2026-cı ildə bu traslarda uğur yalnız sürətdən deyil, enerji idarəçiliyindən və düzgün taktiki balansdan asılı olacaq.