Montsa deyəndə ağla ilk olaraq sürət və qırmızı rəng gəlir. Bu tarixi tras həmişə özünəməxsus aurası ilə seçilib. İtaliyanın şimalında yerləşən tras Ferrari-nin evi sayılır və Formula 1 Dünyasında buraya “sürət məbədi” deyirlər. Bu həftəsonu isə Maks Ferstappen sözün əsl mənasında bu deyimin haqqını verdi və bir neçə rekordu qıraraq, möhtəşəm qələbə qazandı.
Sıralanma turunda rekordla gələn poul
Əslində sərbəst yürüşlərdən sonra əksəriyyət sıralanma turu üçün McLaren və Ferrari-nin şanslarını daha üstün görürdülər. Lakin Formula 1 atalar sözü deyir ki, sən saydığını say, gör Maks Ferstappen nələr sayır.
Red Bull komandasının pilotu sıralanma turunun ikinci sessiyasından etibarən üstün görünməyə başladı və bu üstünlüyünü son final sessiyasına da daşıyaraq, poul aldı. Özü də necə? Dördqat Dünya Çempionu 264.682 kilometr/saat orta sürətlə Formula 1 tarixinin ən sürətli dövrəsini vurdu. Bu isə yeni rekord demək idi. Bununla da Maks 2018-ci ildə Kimi Rəykkönenin bu trasdakı 263.588 kilometr/saatlıq orta sürətli rekordunu qırmış oldu.
Lakin niderlandlı sürücünün yarışdakı işi heç də asan olmayacaqdı, çünki arxasında bu mövsüm 15 yarışdan 12-ni qazanmış McLaren sürücüləri var idi. Bundanbaşqa keçən il burada qalib gəlmiş Şarl Lekler də qələbəüçün əlindən gələni edəcəkdi.
Ferstappen bu dəfə əfsanəvi Şumaxerin rekordunu qıraraq yarışı qazanır
Montsa yarışının xüsusilə ilk dövrələri çox maraqlı keçdi. Maks Ferstappen yarışın bu fazasında rəqibi Lando Norrislə mübarizə aparsa da, burada üstün təsir bağışladı. O, bu yarışda başqa səviyyədə sürürdü və“sürət məbədi” ifadəsinin qarşılığını verirdi. Bunun məntiqi nəticəsi kimi Maks Ferstappen 22 illik bir rekordu qırdı. Belə ki, dördqat Dünya Çempionu yarışı1 saat 13 dəqiqə 24.32 saniyədə tamamlayaraq, Mixael Şumaxerin Montsadakı 1 saat 14 dəqiqə 19.838 saniyəlik rekordunu geridə qoydu.
İtaliya Qran Prisində bir yarış həftəsonu iki rekord qırasan və hər ikisi də Ferrari-yə aid olsun. Artıq Montsanın sürət statistikalarına Ferrari qırmızısı yox, Red Bull qırmızısı başçılıq edir. “Sürət məbədi”ndəartıq “qırmızı at” yox, “qırmızı öküz” şaxə qalxır!
Beləliklə, Maks mövsümdə üçüncü qələbəsini qazandı. Özü də bu üç qələbədən ikisi İtaliyada keçirilən yarışlara təsadüf edir – İmola və Montsa.
Bununla da, əfsanəvi trasda bu dəfə də tarix yazıldı, amma tarix kitabının üzündə artıq bir adamın adı var – Maks Ferstappen
Növbəti dayanacaq – Bakı
Mövsümün növbəti yarışı isə Bakıda baş tutacaq. Sürücülər “Sürət məbədi”ndən çıxıb, ən sürətli şəhər tipli traslardan birinə gələcəklər.
Red Bull Bakı Şəhər Halqasında ən çox yarış qazanmış komandadır. Onlar paytaxtımızda 4 dəfə damalı bayrağı hamıdan öndə görüblər. Honda motorlarının Montsadakı maksimal sürətlərini nəzərə alsaq, paytaxtımızda da Maks Ferstappendən növbəti qələbəni görə bilərik.
Bəs bu dəfə nələr olacaq? Yarışda nələr baş verə bilər? Məlumatlı olmaq üçün bizi izləyin.
Şərh əlavə et