F1 yay fasiləsindən sonra Zandfortda yenidən start alır. Mövsümün ilk yarısı Fernando Alonso üçün uğurlu olmayıb: ispan pilot ilk 8 yarışda xal qazana bilməyib və hazırda 26 xalla sürücülər çempionatında 11-cidir.
İspaniyalı sürücü mətbuat konfransında yay fasiləsini belə dəyərləndirib: “Pis deyildi. Spa və Macarıstanda yaşadığım bel ağrısından bərpa olunurdum. Fasilənin ilk hissəsi buna getdi, sonrasında bir az məşq, bir az da istirahət oldu”.
Zandfort gözləntiləri barədə Fernabdo Alonso belə deyib: “Heç nə əvvəlcədən dəqiq deyil. Zandfortun, Montsanın və ya Sinqapurun yaxşı və ya pis olacağını əvvəlcədən deyə bilmərik. Dünya çempionluğu uğrunda mübarizə aparmırıq, ona görə də hər həftəsonu nəticə hər şeyi dəyişmir. Rəqiblərimizdən daha çox xal toplamağa çalışırıq”.
O, Aston Martin-in hədəfini də açıqlayıb: “Mühəndislər Kubokunda 5-ci yeri tutmaq istəyirik. Son iki ildə 5-ci olduq və daha pis nəticə istəmirik. Çətin başlanğıcdan sonra bu, yenidən mümkün görünür. Amma bu il çempion olmayacağıq”.
Alonso həmçinin Adrian Nyui ilə iş prosesinin getdikcə daha yaxşı qurulduğunu vurğulayıb: “Onunla daha çox vaxt keçirdikcə işə yanaşmasını daha yaxşı anlayırsan. Çox xüsusi insandır, onu tam anlaya bilən adam sayı azdır. Hələ öyrənmə mərhələsindəyik, hər söhbət və hər ideya diqqətlə dəyərləndirilir. Bu sayədə komanda kimi böyüyürük”.
Şərh əlavə et