Red Bull Formula 1 komandasında ciddi rəhbərlik dəyişikliyi baş verib. Komandaya 20 ildən artıqdır rəhbərlik edən Kristian Horner ilə yollar ayrılıb. Bu qərar dərhal qüvvəyə minib və Formula 1 dünyasında geniş rezonans doğurub.
Kristian Horner Red Bull-un qurulduğu gündən – 2005-ci ildən etibarən komandanın rəhbəri idi. Onun rəhbərliyi dövründə komanda bir neçə dünya çempionluğu qazansa da, son bir ildə komandanın zəifləmısi bu ayrılığın əsas səbəbi kimi göstərilir.
Hazırda Red Bull Mühəndislər Kubokunda dördüncü yerdə qərarlaşıb. Komandanın əsas pilotu Maks Ferstappen bu mövsüm iki yarışda qələbə qazansa da, Red Bull-un üstünlüyü artıq əvvəlki kimi deyil. Keçən ilin may ayından etibarən McLaren-in performans baxımından Red Bull-a çatması ilə vəziyyət dəyişib.
Bundan əlavə, komandanın əsas texniki simaları – Texniki Direktor Ədrian Nyui və İdman Direktoru Conatan Vitli də yaxın aylarda komandadan ayrılıblar. Bu ayrılıqlar komandanın stabil strukturunu sarsıdıb.
Maks Ferstappenin Red Bull ilə 2028-ci ilə qədər müqaviləsi olsa da, müqavilədə yer alan ləğvetmə maddələri bu yay aktivləşə bilər. Xüsusilə Mercedes-in Ferstappen ilə maraqlandığına dair iddialar da gündəmdə qalmaqdadır.
Red Bull-un yeni komanda rəhbəri isə Racing Bulls-un keçmiş rəhbəri Loren Mekis olub. Mekisin Racing Bulls-dakı yerini isə bu komandada yarış direktoru vəzifəsini daşıyan Alan Permeyn tutub.
Loren Mekis Red Bull-a təyinatı barədə bunları deyib: “Son bir il yarımda Piter Bayer ilə birlikdə Racing Bulls komandasını idarə etmək böyük şərəf idi. Komandanın qurulmasına töhfə vermək hər birimiz üçün böyük bir macəra oldu. Düşünürəm ki, bu hələ başlanğıcdır. Alan komandaya rəhbərlik etmək üçün ideal namizəddir. O, komandamızı bütün detalları ilə tanıyır və ilk uğurlarımızda əsas rola sahib idi”.
Şərh əlavə et