Fransalı sürücü biləyindən aldığı zədə səbəbindən Niderland, Monza və Madrid yarışlarından kənar qalmışdı. Fransalı pilotu Racing Bulls komandasından Liam Louson əvəz etmişdi.
Lakin müalicə prosesindən sonra zədəsini tam sağaldan gənc pilot ölkəmizdəki yarışda yenidən trasa çıxacaq.
Bolidə qayıdacağı üçün böyük həyəcan keçirdiyini bildirən Ayzek Hacar belə deyib: “Bolidimə qayıdacağım üçün inanılmaz dərəcədə həyəcanlıyam. Son bir ay mənim üçün olduqca çətin keçdi. Həyatımda ilk dəfə yarışlardan uzaq qaldım və buna öyrəşmək çox qəribə hiss idi.
Zədələndiyim ilk andan etibarən mümkün qədər tez qayıtmaq üçün bütün diqqətimi bərpa prosesinə yönəltdim. Bu müddətdə göstərdikləri səbrə görə Lorenə və komandaya təşəkkür etmək istəyirəm. Qərarı tələsik verməmək son dərəcə vacib idi”.
Zədədən əvvəl Milton Kins mərkəzli komandadakı ilk mövsümündə yüksək temp nümayiş etdirən Hacar ardıcıl olaraq xal qazanmış və Monakoda podiuma yüksəlmişdi.
Gənc pilot bu həftəsonu sükan arxasına keçdikdə məqsədinin qaldığı yerdən davam etmək olduğunu vurğulayıb: “İndi ən yaxşı bacardığım işə, yəni pilotaj fəaliyyətinə qayıtmağa özümü hazır hiss edirəm. Bakı unikal trasdır və həftəsonunun ilk anından etibarən tam diqqət tələb edir.
Bolidə sonuncu dəfə əyləşməyimdən xeyli vaxt keçsə də, simulyator məşqimiz olduqca yaxşı keçdi. Trasa çıxaraq dərhal tempi tutmağı səbirsizliklə gözləyirəm”.
Şərh əlavə et