Komandanın qurulma mərhələsindən etibarən rəhbərliyi üzərinə götürən Qrem Loudon ilə yollar ayrılıb. Budkovskinin gəlişi ilə Cadillac uzunmüddətli rəqabət qabiliyyəti hədəfinə doğru yeni mərhələyə qədəm qoyur.
49 yaşlı polşa-fransız mühəndis Formula 1-də 20 ildən çox təcrübəyə malikdir. Budkovski karyerası ərzində Prost, Ferrari, McLaren və FIA-da, son olaraq isə Alpine-də yüksək vəzifələrdə çalışıb.
Cadillac F1 komandasının baş direktoru Den Touriss rəhbərlikdəki bu dəyişiklik barədə danışıb: “Marçinin təyin olunması Cadillac-ın inkişafında mühüm addımdır. Əvvəldən əsas məqsədimiz sadəcə Formula 1-də iştirak etmək olmayıb. Biz ön sıralarda mübarizə apara biləcək yeni nəsil komanda qurmaq istəyirik.
Cadillac üçün yeni mərhələyə qədəm qoyarkən Marçin bizə böyük Formula 1 təcrübəsi, texniki bilik və strateji liderlik gətirir. O, təşkilatımızı gücləndirməyə kömək edəcək. Uzunmüddətli uğur üçün lazım olan qalib düşüncəsini, alətləri və iş proseslərini də inkişaf etdirəcək.
Cadillac Formula 1 komandasını sıfırdan qurarkən göstərdiyi liderliyə və oynadığı rola görə Qrem Loudona minnətdarıq. Onun töhfələri komandamızın qurulma mərhələsində möhkəm təməl yaratmasına kömək edib. Etdiyi işlərə görə ona təşəkkür edir və gələcək karyerasında uğurlar arzulayırıq”.
Yay fasiləsindən sonra Zandfortda keçiriləcək Niderland Qran Prisində komandanın rəhbəri kimi debüt edəcək Marçin Budkovski isə hədəflərindən danışıb: “Cadillac Formula 1 komandası böyük ambisiyalara malikdir.
Bu mərhələ komanda üçün aydın hədəfi olan böyük bir fürsətdir. Büdcə limiti çərçivəsində bolidin inkişafını maksimum səviyyəyə çatdırmaq istəyirik. Eyni zamanda komandanın bütün bölmələrini rəqabət aparmağa hazır vəziyyətə gətirməliyik.
Bu, qalib düşüncəsinə sahib, əzmli və çətinliklər qarşısında geri çəkilməyən bir struktur yaratmaq deməkdir. Detallara və iş proseslərinə diqqət yetirməliyik. Yarış günündə isə hər şeyi mümkün qədər dəqiq yerinə yetirməliyik.
Mənim əsas diqqətim komandanı, bolidlərimizi və məlumat axınını düzgün şəkildə əlaqələndirmək olacaq. Məqsədimiz düzgün qərarları daha sürətli qəbul etməkdir. Həmçinin hər dəfə trasa çıxdığımızda bolidin performansını artırmağa çalışacağıq.
Növbəti mərhələ Zandfortdan etibarən Cadillac Formula 1 komandasının trasdakı fəaliyyətinə rəhbərlik etmək mənim üçün böyük şərəf olacaq”.
Şərh əlavə et