Sessiya başlamazdan əvvəl havanın temperaturu 28°C, asfaltın temperaturu isə 38°C ölçülüb. Start siqnalından sonra sürücülər trasa çıxıblar və 45 dəqiqəlik məşq başlayıb.
Sessiyanın ilk beş dəqiqəsində sürücülər təkərləri optimal iş rejiminə çatdırmaq üçün bir neçə dövrə vurublar. Françesko Banyaya əyləc problemi səbəbindən trasdan kənara çıxıb və hadisədən sonra qısa müddətlik boksa qayıdıb.
Sessiyanın əvvəlində Fabio Di Cannantonio 1:34.969 nəticə ilə liderliyi ələ alıb. Daha sonra o, vaxtını 1:33.829-a qədər yaxşılaşdırıb.
Pedro Akosta 1:33.057 nəticə ilə birinci yerə yüksəlib, Xorxe Martin isə onun arxasında qərarlaşıb. Lakin ilk sürətli dövrəsini tamamlayan Mark Markes 1:32.757 nəticə ilə liderliyi ələ keçirib. Az sonra Marko Bezzekki 1:32.589-la zirvəyə yüksəlsə də, Di Cannantonio 1:32.516 nəticə ilə onu geridə qoyub.
İlk sürətli dövrələrdən sonra sürücülərin böyük hissəsi sazlamalar və məlumatların təhlili üçün boksa qayıdıb.
Trasa yenidən çıxıldıqdan sonra sessiyanın ortalarında Bezzekki 1:32.476 nəticə ilə qısa müddətlik lider olub. Lakin Martin 1:32.455 nəticə ilə yenidən birinci yerə yüksəlib. Markes 1:32.913 nəticə göstərərək altıncı pilləyə yerləşib. Bir qədər sonra Bezzekki 1:32.311 nəticə ilə liderliyi geri qaytarıb.
Markes Bezzekkiyə cavab verməyə hazırlaşarkən motosikletinə nəzarəti itirib və 16-cı döngədə çınqıl zonasına çıxaraq qəzaya uğrayıb. Hadisədən sonra sarı bayraqlar göstərilib və ispaniyalı sürücü boksa qayıdıb.
Ai Oqura Markesin qəzası səbəbindən perspektivli sürətli dövrəsini yarımçıq dayandırmalı olub. Toprak Razqatlıoğlu isə 1:34.153 nəticə ilə vaxtını yaxşılaşdırsa da, 21-ci pillədə qalmağa davam edib.
Sessiyanın son 10 dəqiqəsində sürücülər son sürətli cəhdlər üçün yenidən boksa qayıdıblar.
Son beş dəqiqədə trasa çıxan sürücülər nəticələrini yaxşılaşdırmağa başlayıblar. Ai Oqura 1:32.559 nəticə ilə dördüncü yerə yüksəlib. Banyaya 1:32.545 nəticə ilə beşinci pilləyə qalxıb. Raul Fernandes dördüncü yerə yüksələrkən, Maverik Vinyales 1:32.667 nəticə ilə səkkizinci olub.
Xoan Mir 1:32.551 nəticə ilə altıncı yerə yüksəlib. Oqura isə növbəti cəhdində 1:32.475 nəticə göstərərək dördüncü pillədə mövqeyini möhkəmlədib.
Damalı bayraq göstərildikdən sonra dövrəsini tamamlayan Banyaya 1:32.409 nəticə ilə Martinı geridə qoyaraq ikinci pilləyə yüksəlib. Beləliklə, 1-ci sərbəst yürüş sessiyasını Marko Bezzekki lider başa vurub.
Şərh əlavə et