GPBlog-un məlumatına görə, Fransanın Formula 1 təmsilçisi Alpine lüks moda markası Gucci ilə böyük bir titul sponsorluğu müqaviləsi imzalamağa hazırlaşır. Razılaşma baş tutarsa, komandanın yeni adının “Gucci Alpine Formula One Team” ola biləcəyi bildirilir.
Hazırda komandanın rəsmi adı BWT Alpine Formula One Team kimi qeyd olunur. Lakin mövcud titul sponsoru BWT-nin mövsüm sonunda müqaviləni bitirə biləcəyi ehtimal edilir.
Bu vəziyyət Alpine üçün yeni baş sponsor axtarışını gündəmə gətirərkən, ən güclü namizəd kimi Gucci ön plana çıxır.
Gucci-nin daxil olduğu Kering qrupunun CEO vəzifəsinə ötən il Luca de Meo gətirilib. De Meo əvvəllər uzun müddət Renault-un baş direktoru kimi çalışıb və Formula 1 layihəsinin əsas fiqurlarından biri olub. Bu səbəbdən Gucci ilə Alpine arasındakı əlaqənin təsadüfi olmadığı düşünülür.
Dünyanın ən böyük lüks brendlərindən biri olan Gucci-nin Formula 1-in xüsusilə ABŞ və Avropadakı artan populyarlığından faydalanmaq istədiyi bildirilir.
Razılaşmanın maliyyə detalları hələ məlum olmasa da, belə bir sponsorluğun Alpine-ə on milyonlarla dollar gəlir qazandıra biləcəyi ehtimal olunur.
Alpine isə yayılan iddialara qısa cavab verib: “Alpine Formula One Team daim yeni tərəfdaşlıq imkanlarını dəyərləndirir və potensial partnyorlarla görüşlər keçirir. Lakin bu görüşlər məxfi saxlanılır və yalnız bütün tərəflər razılığa gəldikdə açıqlanır”.
Şərh əlavə et