Görüşdə tərəflər texniki reqlamentdə enerji idarəetməsi ilə bağlı bəndlərə düzəlişlərin edilməsinin zəruri olduğu qənaətinə gəliblər. Müzakirələrin aprel ayı ərzində davam edəcəyi, yekun qərarın isə 20 aprel tarixində qəbul olunacağı bildirilib.
İlk görüşün yekunlarına əsasən FIA rəsmi bəyanat yayıb: “Bu gün FIA Formula 1-in 2026-cı il reqlamentində mümkün dəyişikliklərin müzakirəsi üçün görüşlər silsiləsinin ilkini keçirib.
FIA, komandaların texniki mütəxəssisləri və güc qurğuları istehsalçılarının iştirakı ilə baş tutan görüş 2026-cı il üçün texniki və idman reqlamentinin təbii inkişafı çərçivəsində bir sıra mövzuları əhatə edib.
Ümumilikdə tərəflər belə qənaətə gəliblər ki, indiyə qədər keçirilmiş yarışlar kifayət qədər maraqlı alınsa da, enerji idarəetməsi sahəsində bəzi məqamların tənzimlənməsi zəruridir. Xüsusilə rəqib tərəflərin iştirakı nəzərə alınsa, mürəkkəb məsələlər üzrə konstruktiv dialoq aparılıb.
Daha əvvəl bu ilin əvvəlində bütün tərəflər razılaşmışdı ki, bu görüşlər 2026-cı mövsümün ilk üç yarışından sonra keçiriləcək. Təqvim elə tərtib olunub ki, müzakirələr başlamazdan əvvəl kifayət qədər texniki məlumat toplamaq mümkün olsun.
Yaxın iki həftə ərzində birgə müzakirələr çərçivəsində əlavə görüşlər planlaşdırılıb. Aprelin 15-də idman reqlamentinə həsr olunmuş iclas keçiriləcək və burada texniki dəyişikliklərin tətbiqi üçün “B bölməsi”ndə nəzərdə tutulan düzəlişlər müzakirə olunacaq.
Növbəti texniki görüş aprelin 16-da baş tutacaq – burada həm bu gün müzakirə olunan məsələlərə yenidən baxılacaq, həm də yeni mövzular gündəmə gətiriləcək.
Aprelin 20-də isə bütün maraqlı tərəflərin iştirakı ilə yüksək səviyyəli görüş keçiriləcək. Bu iclasda texniki qrupların birgə təklif etdiyi üstün variantların nəzərdən keçiriləcəyi və gələcək addımlar üzrə konsensusun əldə olunacağı gözlənilir.
2026-cı il reqlamenti komandalar, avtomobil istehsalçıları, güc qurğusu istehsalçıları, kommersiya hüquqlarının sahibi və FIA-nın sıx əməkdaşlığı nəticəsində hazırlanaraq razılaşdırılıb. Potensial dəyişikliklər də məhz bu əməkdaşlıq ruhunda müzakirə olunur.
Reqlamentdə ediləcək istənilən dəyişiklik FIA-nın Ümumdünya Şurası tərəfindən təsdiqlənməlidir”.
Şərh əlavə et