Kokpit.az xatırladır ki, Mercedes komandası Lyuis Həmiltonun ayrılışından sonra onun əvəzinə Kimi Antonellini gətirmişdi. Lakin italyan sürücünün hələ 18 yaşı var və Formula 1-də bu il debüt edəcək. Ona görə də gənc sürücünün transferi müzakirələrə səbəb olub.
Antonelli karyerası ərzində böyük istedad kimi göstərilib, ancaq keçən il Formula 2-dəki performansı heç də ürəkaçan deyildi.
Jak Vilnöv: “Məncə, Andrea Kimi Antonelli üçün hələ çox tezdir. Formula 2-də bərbad mövsüm keçirdi. Bəlkə də Formula 1 müqaviləsi bağladığı üçün üzərindəki təzyiq artdı ya da bu tip maşınları sevmədi. Ancaq əsl səbəbi kim bilir? Bunların hamısı sual işarəsidir və tezliklə cavablarını alacağıq.
Risk almağı və limitlərdə sürməyi sevən sürücü kimi görünür, amma hələ də limitlərini bilmirik. Mercedes-də necə işləyəcəyi və Corc Rassell ilə necə uyğunlaşacağı hələ də müəmmalıdır. Sürüş tərzləri tamamilə zidd ola bilər və bu da komandanın inkişafına mənfi təsir göstərər.
Toto Volff onu 12 yaşında transfer etdi və karyerasını maliyyəlişdirdi. Bu ata-oğul münasibətinə bənzəyir. Belə olan halda qərar vermək də emosional ola bilir”.
Mercedes komandası ehtiyat sürücü kimi Valtteri Bottası transfer edib. Buna görə də əksəriyyət düşünür ki, Antonelli zəif çıxış etsə, onu Valtteri Bottas əvəz edəcək: “Bottas Antonellidən daha yaxşıdır? Daha təcrübəli ola bilər, amma keçən ili xatırlayaq. Sürətin yoxdursa, yoxdur! Mercedes çox böyük risk aldı. Antonellinin hazır olduğuna ümid edərək qərar verdilər və artıq hər şey özündən asılıdır. Ümid edirəm ki, Formula 2-dəki keçirdiyi pis mövsüm istisnadır”.
Şərh əlavə et