Kokpit.az xatırladır ki, FİA-nın qaydalarına görə komandalar ildə iki dəfə gənc sürücüləri trasa çıxarmalıdırlar. Bu sürücülər Formula 1 karyeraları ərzində maksimum iki yarışda çıxış edə bilərlər.
Lakin Oliver Berman Braziliya Qran Prisində Kevin Maqnusseni əvəz etmiş və Formula 1 karyerasında üçüncü yarışına qatılmışdı. Buna görə də Ferrari daha sərbəst yürüşlərdə Oliver Bermanın xidmətindən yararlana bilməyəcək.
Belə olan halda Scuderia Ferrari komandası alternativləri dəyərləndirib və mövsümün son Qran Prisi olan Əbu Dabidə birinci sərbəst yürüşlərdə Karlos Saynsın əvəzinə trasa Antonio Fuokonu çıxaracaq. İtalyan sürücü son mövsümü Dünya Dözümlülük Çempionatında keçirib və o, Niklas Nilsen və Migel Molina ilə Ferrari 499P maşınını paylaşaraq bu il 24 saatlıq Le Man Marafonunun qalibi olub.
Antonio Fuokonun Əbu Dabidə birinci sərbəst yürüşlərdə sükan arxasına keçidi qətiləşsə də, Ferrari komandası bu barədə hələ rəsmi açıqlama verməyib. Bu açıqlamanın növbəti günlərdə verilməsi gözlənilir. Onun 38 nömrəli maşınla trasa çıxması güman edilir.
Şərh əlavə et