Azərbaycan yarışında hər iki avtomobillə xal qazanmaq şansı əldə edən Alpine Franko Kolapintonun ilk döngədəki səhvi ilə böyük məyusluq yaşayıb.
Argentinalı pilotun təkərləri bloklayaraq komanda yoldaşı Pyer Qasliyə çırpılması, Qaslinin isə McLaren pilotu Lando Norrisin trasdan çıxmasına səbəb olması ilə nəticələnən qəza Briatorenin sərt reaksiyasına səbəb olub.
Komandanın hər iki avtomobillə xal qazanmaq şansını əldən verməsinə qəzəblənən Briatore deyib: “Çempionat mübarizəsində çox dəyərli xallar itirdiyimizi nəzərə alaraq, bugünkü yarışın nəticəsindən son dərəcə məyusam. Xüsusilə hər iki avtomobillə xal qazana biləcəyimiz əla mövqedə olduğumuz halda belə hadisələr qətiyyən baş verməməlidir. Komanda adından həftəsonu boyunca möhtəşəm iş görən Pyer üçün çox üzülürəm. Həmçinin yarışlarını məhv etdiyimiz üçün Landodan və McLaren komandasından üzr istəyirəm.
Frankonun üzərinə düşən bütün məsuliyyəti öz üzərinə götürdüyünü bilirəm. Həqiqətən də yarışın gedişatını və təhlükəsizlik avtomobilindən sonra restart şərtlərini nəzərə alsaq, o, çox gec əyləclədi.
Onun təcrübəsində olan bir pilot üçün bu, son dərəcə pis və həvəskarcasına edilmiş bir hərəkət idi. Belə bir hadisədən nəticə çıxarıldığına əmin olmaq və gələcəkdə oxşar halların qarşısını almaq üçün vəziyyəti sakit şəkildə dəyərləndirmək və hansı addımı atacağımıza qərar vermək istəyirəm”.
Şərh əlavə et