Avstraliyalı pilot yarışın ilk yarısında güclü temp nümayiş etdirməsinə baxmayaraq, Bakını xalsız tərk etməyin məyusluğunu yaşadığını bildirib.
Lando Norrisin yarışın ilk hissəsindəki qəzasına bənzər şəkildə ilk döngədə ön təkərləri bloklanan Piastri trasdan çıxıb. Gənc pilot hadisənin onun üçün də gözlənilməz olduğunu deyib və səbəbini anlamaq üçün məlumatları araşdırmalı olduğunu bildirib: “Nələrin baş verdiyini görmək üçün məlumatlara baxmalıyam, çünki bu, həqiqətən məni təəccübləndirdi.
Çox gec və ya həddindən artıq sərt əyləclədiyimi düşünmürəm. Birdən-birə hər iki ön təkərim bloklandı. Buna görə də bunun səbəbini araşdırmalıyam.
Günün bu şəkildə başa çatması tamamilə məyusedicidir. Yarışın ilk yarısının çox güclü keçdiyini düşünürəm. Buna görə nümayiş etdirdiyimiz performansdan sonra əlimizdə heç nə olmaması həqiqətən çox təəssüf doğurur”.
Yarışın ilk hissəsində yumşaq təkərlərlə mübarizə aparan Piastri McLaren-in döngələrdəki üstünlüyünə baxmayaraq, düzlükdə Red Bull və Mercedes qarşısında çətin vəziyyətdə qaldıqlarını bildirib.
Hava kisəsindən də istifadə edə bilmədiyini deyən avstraliyalı pilot trasdakı mübarizəni belə təsvir edib: “Açığı, bir qədər əsəbiləşdirici mübarizə idi. Çünki əla dövrə keçdiyinizi hiss edirdiniz, ancaq sükanın ekranında fərqin hər dövrədə düzlükdə əriyib getdiyini görürdünüz.
Corc Rassellin bu qədər sürətli olması bizim üçün bədbəxtlik oldu. Çünki o, o qədər öndə idi ki, onun hava koridorundan istifadə edə bilmirdim. Buna görə də bir növ düzlükdə rəqiblər qarşısında tamamilə müdafiəsiz qalırdım.
Buna baxmayaraq, yarışın ilk yarısında, xüsusilə də Soft təkərlərlə çox güclü idik. Buna görə bunu həftəsonunun müsbət tərəflərindən biri kimi qeyd edəcəyik”.
Şərh əlavə et