Azərbaycan yarışını lider Corc Rassellın təxminən 22 saniyə gerisində 6-cı yerdə tamamlayan britaniyalı sürücü yarışdan sonra jurnalistlərə danışıb. Yeddiqat Dünya Çempionu həftəsonu ərzində təkərləri lazımi temperatur diapazonuna gətirməkdə ciddi çətinlik çəkdiklərini deyib. O, həmçinin düzlük sürəti və gücün idarə olunması baxımından problemlər yaşadıqlarını vurğulayıb.
Yarışın böyük hissəsində ön qrupdan uzaq qaldığını və arxasındakı avtomobillərə qarşı müdafiə olunmaqda çətinlik çəkdiyini bildirən Həmilton deyib: “Hazırda hansı komandanın neçənci sürətli olmasının nə əhəmiyyəti var, bilmirəm.
İkinciyik, yoxsa üçüncüyük, bunun mənim üçün fərqi yoxdur. Hazırda ən sürətli ikinci komanda olmadığımız açıqdır. Lakin bu yarışda McLaren-dən öndə idik. Deməli, bəlkə də üçüncü komandayıq.
Problem yalnız düzlük sürəti deyildi. Mənim üçün bütün həftəsonu təkərləri düzgün iş rejiminə gətirməyə çalışmaqla keçdi. Buna nail ola bildiyimizi də düşünmürəm. Bizim avtomobildə bunun niyə bu qədər çətin olduğunu heç cür başa düşə bilmirəm.
Məşqlərdə vəziyyəti bir qədər düzəltmək üçün bəzi sazlama dəyişiklikləri etdik və üçüncü məşq seansında avtomobil bir qədər yaxşı idi.
Amma sıralanma turuna gələndə təkərləri qızdırmaq sözün əsl mənasında işgəncəyə çevrildi. Bunu yaşayan çoxlu pilot var idi, amma digərləri bu problemdən sanki daha az təsirlənmişdi.
Yarışda da vəziyyət tamamilə bundan ibarət idi. İlk hissənin sonlarına doğru birdən-birə təkərlərimdən daha yaxşı performans almağa başladım və pis sayılmayacaq temp tapdım.
Lakin Medium təkərlərə keçəndə yenə eyni problemlərlə üzləşdim. Üstəlik, gücün ötürülməsi problemi də vardı. Rəqiblərimiz isə sanki trasın hər yerində fasiləsiz güc əldə edirdilər.
Normalda müdafiə olunmağa ehtiyacım olmayan 2-ci, 4-cü və ya 5-ci döngələrdə belə ideal xəttimi bağlamaq məcburiyyətində qalmağım tamamilə mənasız idi”.
Şərh əlavə et