Monakolu pilot zəif startının yarışını çətinləşdirdiyini bildirib və rəqiblərinin inkişafı fonunda Ferrari-nin avtomobil performansında geriləmə yaşadığına diqqət çəkib.
Sıralama turunu ikinci pillədə başa vurduqdan sonra ümidləndiyini, lakin yarış tempində Red Bull Racing və Mercedes ilə rəqabət apara bilmədiklərini bildirən Şarl Lekler ilk dövrələrdə itirdiyi vaxtın bütün strategiyalarını pozduğunu deyib.
İtaliya komandasının Bakıdakı vəziyyətini dəyərləndirən Şarl Lekler yarışdan sonrakı hisslərini belə ifadə edib: “Düşünürəm ki, söhbət təkcə düzlüklərdəki sürətdən getmir. Ümumilikdə yarış tempinə görə Red Bull Racing və Mercedes ilə müqayisədə qətiyyən yaxşı səviyyədə deyildik.
Bəzi məqamlarda McLaren ilə başabaş mübarizə apara bildik. Lakin çox pis start götürdük və təəssüf ki, bu vəziyyət yarışımızın qalan hissəsinə tamamilə təsir etdi.
Həqiqətən də çox təəssüf oldu. İkinci pilləni əldə etdikdən sonra ümidli idim, amma realist yanaşsaq, bu gün çətin yarış keçirəcəyimizi onsuz da bilirdik”.
Mövsümün qalan hissəsində Ferrari üçün daha uyğun trasların olacağını qəbul etməklə yanaşı, komandasını da tənqid edən Lekler rəqiblərinin inkişaf tempinə diqqət çəkib.
Avtomobilin döngələrdəki və şassi performansında geridə qaldıqlarını bildirən Lekler gələcəklə bağlı bunları deyib: “Düşünürəm ki, bizə uyğun traslar olacaq, amma açıq danışmalıyıq.
McLaren və Red Bull Racing irəliyə doğru çox böyük addımlar atıb. Mercedes-in də ciddi irəliləyiş əldə etdiyini düşünürəm.
Buna görə də mövsümün müəyyən mərhələsində sahib olduğumuz ən yaxşı şassiyə artıq sahib olduğumuzu düşünmürəm. Bu, üzərində mütləq çalışmalı olduğumuz məsələdir”.
Şərh əlavə et