Azərbaycan Qran Prisində düzlük sürətinin aşağı olması səbəbilə onsuz da çətin yarış keçirən Lando Norris ilk döngədə düşdüyü qəza səbəbindən yarışı erkən başa vurmalı olub. Alpine pilotlarının təmasından zərər görən britaniyalı pilot rəqiblərinin diqqətsizliyini və FIA-nın bu cür hadisələrə münasibətini tənqid edib.
Yarışdan sonra jurnalistlərə danışan Norris temp baxımından çatışmazlıqlarının olduğunu qəbul edərək deyib: “Əlbəttə, sürüşümdə kifayət qədər yaxşı etmədiyim bəzi məqamlar var. Növbəti yarış üçün nələri inkişaf etdirməli olduğuma baxacağam.
Amma təhlükəsizlik avtomobilindən sonra rəqiblərin yanımdan keçdiyi sürət inanılmaz idi. Müdafiə olunmaq demək olar ki, mümkün deyildi.
Batareyanın gücü ötürmə forması səbəbindən bu trasda ötmə etmək çox çətindir. FIA yanlış problemləri həll etməyə çalışır. Mühərriklər düzəldilməlidir. Bəlkə bundan sonra ötmələr çoxalar və daha effektiv müdafiə imkanları yaranar.
Qəzaya hələ ətraflı baxmamışam. Amma məncə, FIA daha sərt olmalı və belə hallar üçün yarışdan kənarlaşdırma cəzaları tətbiq etməyə başlamalıdır. Bu insanların etdiyi tamamilə diqqətsizlikdir.
Bu, komandaya da ciddi maliyyə zərəri vurur. Hazırda avtomobilimin bütün hissələri zibil qutusundadır. Belə pilotlar birbaşa yarışdan kənarlaşdırılmalıdır. Çünki onların sürüş tərzi Formula 1-də olmağa layiq deyil.
Corc təhlükəsizlik avtomobilindən sonra restartı istədiyi kimi edə bilər. Burada problem yoxdur. Formula 1-də pilotlardan bəzi şeyləri əvvəlcədən nəzərə almalarını, yol tutuşunun və ya təkər temperaturunun aşağı ola biləcəyini hesablamalarını gözləyirsiniz. Halbuki temperaturlar o qədər də aşağı deyildi.
Formula 1-də dünyanın ən yaxşı pilotlarına qarşı yarışmaq istəyirik. Əgər belə hadisələr baş verirsə, bunun səbəbi bəzi pilotların burada olmamalı olmasıdır.
Frankoya kiçik qəza cəzası verilib-verilməyəcəyini bilmirəm. Amma belə bir qəzaya səbəb olursansa, ən azı bir yarışdan kənarlaşdırma cəzası almalısan”.
Şərh əlavə et