Yarışın ilk hissəsini rahat keçirdiyini və fərqi nəzarətdə saxladığını bildirən Rassell təhlükəsizlik avtomobilinin trasdan çıxmasından sonra Red Bull pilotu Maks Ferstappenin təzyiqini hiss etdiyini deyib.
Corc Rassell finiş xəttində yaşanan kritik anları belə təsvir edib: “Yarışın ilk yarısı fərqi artıraraq kifayət qədər rahat keçdi.
Lakin arxamda Maks olduğu halda təhlükəsizlik avtomobili trasa çıxanda öz-özümə ‘bu, heç də asan olmayacaq’ dedim. Nəticədə yarışın sonlarında o, inanılmaz sürüş nümayiş etdirdi. Bottasın qəzasından sonra sarı bayraqlar çıxanda qazı buraxdım. Yenidən qaz pedalına basanda isə turbo işə düşmədi.
Bir anda gücü itirdim və düz finiş xəttində Maks az qala məni keçəcəkdi. Qələbəni məhz orada itirmək böyük məyusluq olardı. Amma nəticə etibarilə hər şeyi ilə inanılmaz həftəsonu oldu”.
Rassell yay fasiləsindən sonra tətbiq etdiyi yeni sürüş tərzinə artıq uyğunlaşdığını bildirib. Çətin günlərdə ona inamını itirməyən komandasına təşəkkür edən təcrübəli pilot yaşadığı dəyişiklikdən də danışıb: “Yenidən zirvədə olmaq möhtəşəm hissdir.
Çətin anlarda mənə inanmağa davam edən və bu prosesdən daha güclü çıxmağıma kömək edən komandama böyük təşəkkürümü bildirmək istəyirəm. Bu həftəsonunu keçirmə tərzimizlə həqiqətən qürur duyuram. Bu yüksək performansın arxasında qəbul etdiyim yeni sürüş tərzi ilə bağlı daha çox təcrübə qazanmağım dayanır. Yay fasiləsindən sonra keçirilən hər yarışda özümü daha da güclənmiş hiss edirəm. Artıq trasda özüm kimi sürə bilirəm və bu, həqiqətən möhtəşəm hissdir”.
Şərh əlavə et