Binotto mətbuat konfransında hər iki pilotun həm yarış tempindən, həm də nümayiş etdirdikləri performansdan razı olduqlarını bildirib və mövcud heyətlə yola davam edəcəklərini açıqlayıb.
Gələn mövsüm üçün pilot qərarından danışan Mattia Binotto bunları deyib: “2027-ci il üçün doğru planın nə olması ilə bağlı aramızda heç bir müzakirə aparılmayıb.
Pilotlarımızın onsuz da müqavilələri var idi və buna görə hər hansı dəyişikliyin olmayacağını bilirdik. Bundan əlavə, hər ikisinin sürətindən çox razıyıq.
Gələn il nə olacağını rəsmən açıqlamağa ehtiyac görmürdük, çünki buna ehtiyac yox idi. Təsdiqlənmiş və birlikdə işləməkdən məmnun olduğumuz pilot heyətimiz var”.
Binotto Formula 3 mövsümünü ikinci pillədə başa vuran və Audi-nin Pilot İnkişaf Proqramına qoşulan gənc istedad Freddi Sleterin gələcək planlarından da danışıb. O, britaniyalı pilotun inkişaf proqramı çərçivəsində 2027-ci ildə Formula 1 üzrə fəaliyyətlərdə iştirak edəcəyini açıqlayıb.
Binotto Sleterin gələcəkdə Formula 1-də yarış pilotu olub-olmayacağının isə göstərəcəyi inkişafdan və performansından asılı olacağını bildirib.
Sleterin F3 mövsümü ərzində göstərdiyi inkişafı, xüsusilə də təkərlərin idarə olunmasında əldə etdiyi irəliləyişi yüksək qiymətləndirən Binotto sözlərini belə davam etdirib: “Fred pilot inkişaf proqramımızın bir hissəsidir. Yüksək potensiala sahibdir və əla iş görür.
Çempionatı ikinci pillədə başa vurdu. Madrinqdəki son həftəsonundan əvvəl çempionatın lideri idi, indi isə ikinci yerdə bitirdi. Bu məsələni onunla birlikdə də müzakirə etdik.
2027-ci ildə Formula 1 üzrə fəaliyyətlərdə iştirak edəcək. Bəli, çünki bu, inkişaf planımızın təbii hissəsidir. Gələcəkdə Formula 1-də yarış pilotu olub-olmayacağı isə nə qədər güclü inkişaf nümayiş etdirəcəyindən asılı olacaq.
Lakin akademiyanızda belə bir pilot varsa, gec-tez planlar onu Formula 1-də yarış pilotu etmək üzərində qurulur.
Onun inkişafından olduqca razıyıq. F3 mövsümünə baxsanız, başlanğıcda bəlkə də təkərləri bir qədər çox yeyirdi. Lakin zaman keçdikcə daha balanslı sürüş tərzinə keçdi, təkərləri daha yaxşı idarə etdi, təcrübə qazandı və mövsümü çox güclü şəkildə başa vurdu”.
Şərh əlavə et