Birinci və ikinci məşq seanslarında texniki nasazlıqlar səbəbindən vaxt itirən Antonelli küçə trasında məşq seanslarını buraxmağın çətinliyindən danışıb. Bolidin ümumi balansından məmnun olduğunu bildirən gənc pilot hisslərini belə ifadə edib: “Əlimizdə olan imkanlarla ən yaxşı nəticəni əldə etməyə çalışdıq.
Birinci məşq seansında çoxlu dövrə itirdim, daha sonra ikinci seansın da yarısını buraxdım. Xüsusilə küçə trasında bu, heç vaxt ideal deyil. Amma ümumi baxanda yaxşı geri dönüş etdiyimizi düşünürəm.
Bolidin içində özümü çox yaxşı hiss edirəm. Əlbəttə, üzərində işləməli olduğumuz bir neçə məqam var, amma sabahı səbirsizliklə gözləyirəm”.
Məşq zamanı bolidin arxa hissəsində alovların yüksəldiyi anlara da toxunan Antonelli yanğının söndürülməsi zamanı marşallara müdaxilə etmələri üçün kömək etməyə çalışdığını bildirib.
İtaliyalı pilot həmin anları və işçilərin müdaxiləsini belə təsvir edib: “Əslində işçilərdən bir qədər daha çox yanğınsöndürən köpük sıxmalarını istədim, çünki təəssüf ki, bolid alovlandı.
Xoşbəxtlikdən ciddi zərər dəymədi. Mən sadəcə marşallara müdaxilə etməyə təşviq edirdim. Xoşbəxtlikdən onlar da əllərindən gələni etdilər”.
Şərh əlavə et