Üstəlik, bu, 21 yaşlı fransalı pilotun növbəti mövsüm üçün müqaviləsinin uzadılması xəbəri ilə eyni vaxta təsadüf edib.
Ayzek Hacar: “Əlbəttə, xüsusilə belə xəbərlərin fonunda yenidən işə qayıtmaq xoşdur. Artıq bunun həyəcanını yaşayıram. Çünki sonuncu dəfə RB22-nin sükanı arxasında Budapeştdə olmuşdum və elə bil, bunun üstündən çox uzun vaxt keçib. Təbii ki, Bakı trası çətin trasdır və məhz burada sükan arxasına qayıtmaq asan deyil. Amma əhvalım çox yaxşıdır və müqaviləmin təsdiqlənməsinə də sevinirəm. Ümumiyyətlə, hər şey əladır!
Əlim kifayət qədər yaxşı vəziyyətdədir və pilotaj etməyə imkan verir. Mənə bundan artığı lazım deyil. Ən çox narahat olduğum məsələ yarışları buraxmağım idi. Trasda mübarizə ilə bağlı təzyiq çatışmırdı. Buna yalnız kənardan baxmalı olduğun zaman anlayırsan ki, həyat əvvəlki qədər maraqlı olmur. Son bir neçə həftə kifayət qədər darıxdırıcı keçib, əhvalım da yaxşı olmayıb və sadəcə mümkün qədər tez sükan arxasına qayıtmaq istəyirdim.
Müqaviləmin uzadılmasına şadam, amma bu, təbii idi. Mən buradayam ki, nəyə qadir olduğumu göstərim. Rəqabətədavamlı bolidimiz var və mən sadəcə mübarizəyə qayıtmaq istəyirəm. Məni qabaqlayan uşaqlara qarşı mübarizə aparmaq istəyirəm – bütün məsələ bundan ibarətdir.
Zədəmə gəlincə, bilək sümüklərimdən birində kiçik çat var idi və bərpa prosesi kifayət qədər uzun çəkdi. Cərrahi müdaxiləyə ehtiyac olmadı və proses təbii şəkildə getdiyi üçün bunun üçün vaxt lazım oldu. Hələ də müəyyən ağrılar hiss olunur, ancaq artıq təxminən altı həftə keçib və mənə deyirlər ki, əlim kifayət qədər yaxşı vəziyyətdədir və yüklənməyə tab gətirəcək.
Buna əmin olmaq üçün simulyatorda işlədim və testlər pis keçmədi. Buna görə də düşünürəm ki, bolidin kokpitində də hisslər təxminən eyni olacaq. Xüsusilə adrenalinin səviyyəsini və digər amilləri nəzərə alsaq, hər şey normal olmalıdır. Məncə, hər şey yaxşı olacaq”.
Şərh əlavə et